Бүгін Бас қаланың халықаралық әуежайына XXXIII жазғы Олимпиада ойындарының күміс жүлдегері Нұрбек Оралбай ұшып келді. Әкімнің орынбасары Ерік Мейірханов пен спортшының ата-анасы боксшыны құттықтап, қарсы алу үшін әуежайға жиналды, деп хабарлайды елорда әкімдігінің ресми сайты. Олимпиада ойындарының финалдық жекпе-жегінде өткен Олимпиаданың күміс жүлдегері украиналық Александр Хижняк Нұрбектің қарсыласы болды. Финалдық кездесу мыңдаған жанкүйер үшін эмоцияға толы болды және Александр Хижняктың жеңісімен аяқталды. «Өкінішке қарай, Олимпиадада 2-орын алып қалдым. Бәсеке оңай болмады. Ешкім жеңілемін деп бармайды. Оны алғашқы айқасымда-ақ байқаған боларсыздар. Алайда чемпиондық атақ үшін ғана барған едім. Бұйырғаны күміс жүлде. Финалға дейін барып, сүрінген де қиын. Тек 1-2 күннен ғана қабылдадым. Іште өкініш болғанымен, бұл сәт мені одан әрі жігерлендіреді. Келесі Олимпиадада қазақ елін қуантып, чемпион атану үшін барымды саламын. Енді 1-2 ай тынығып, алдағы Әлем, Азия чемпионаттарына дайындаламыз», - деді Нұрбек Оралбай. Естеріңізге сала кетейік, Нұрбек Оралбай 2000 жылы 11 маусымда дүниеге келген. 2024 жылғы Олимпиадада онымен бірге егіз ағасы Айбек те өнер көрсетті, ол ширек финалда әзербайжандық боксшы Лорен Альфонсоға жол берді. Нұрбектің қоржынында Жасөспірімдер Олимпиадасының, жастар арасындағы әлем чемпионаттарының, ересектер арасындағы әлем және Азия чемпионаттарының алтын медальдары бар. Енді бұл жетістіктердің қатарын Олимпиада-2024 медалі толықтырды.

Ақпарат көзі: ГУ «Аппарат акима города Астана»