Қазақстан Республикасындағы Адам құқықтары жөніндегі уәкіл Артур Ластаев Солтүстік Қазақстан облысында орналасқан ҚР ІІМ ҚАЖК №51 мекемесінде болды. Қауіпсіздігі жоғары санатқа жататын бұл мекемеде 529 сотталушы жазасын өтеп жатыр, оның ішінде бірнеше рет қылмыс жасағандар да бар.

Уәкілдің аталған мекемеге барудағы мақсаты – сотталғандардың құқықтары мен оларды ұстау жағдайларының сақталуын қадағалау. Сотталғандардың құқықтарын қорғау, азаптау мен қатыгездікке жол бермеу Уәкіл кеңсесі жұмысының басты бағыттарының бірі.

Іс-сапар барысында Артур Ластаев сотталғандармен жеке-жеке әңгімелесіп, тұрмыстық және санитарлық жағдай, медициналық қызмет көрсету, тамақтану, заңсыз емдеу әдістеріне қатысты және т.б. сұрақтарына жауап алды.

Айта кетейік, колонияда арыз-шағымдарды қабылдауға арналған 9 электронды терминал бар. Сондай-ақ мұнда 517 бейнебақылау камерасы орнатылған, көрінбейтін бұрыштар жоқ. Электр қуаты өшіп қалған жағдайда тәулік бойы бақылау жүргізіледі, 2 дизель генераторы бар.

«Сотталғандардың құқықтарын қорғау біздің кеңсе қызметіндегі маңызды миссия болып табылады. Біз тұтқындардың құқықтарының толық сақталуын және олардың азаптауға немесе қатыгездікке ұшырамауын қамтамасыз ету үшін түзеу мекемелеріне барамыз. Ондағы келіп түскен әрбір өтініш мұқият қаралып, уәкілетті органдарға тиісті ұсыныстар жолданады», - деп атап өтті Уәкіл.

Адам құқықтары жөніндегі уәкіл аумақты аралап, бас бостандығынан айырылушылардың қамаудағы және жұмыс істейтін негізгі үй-жайларын қарады. Колония аумағында 3 өндіріс саласы – тігін, ағаш өңдеу және металл конструкцияларын құрастыру цехы бар. Жақын арада мұнда тігін цехы орналасатын жаңа жұмыс орындары ашылатын жаңа ангар салынатын болады. Бүгінде мекемеде 115 сотталушы жұмыспен қамтылған.

Түзеу мекемесін қарау барысында Артур Ластаев жеке қабылдау өткізіп, сотталғандарға өз құқықтары түсіндіріліп, көмек көрсетілді.

Еске салайық, Қазақстан Республикасындағы Адам құқықтары жөніндегі уәкіл Артур Ластаев сотталғандардың құқықтарының сақталуын қадағалау мақсатында жыл басынан бері 6 түзеу мекемесіне барды.

Ақпарат көзі: Қазақстан Республикасындағы Адам құқықтары жөніндегі уәкіл