2024 жылғы 8 желтоқсанға тағайындалған мәслихаттардың шығып қалған депутаттарының орнына сайлауды дайындау және өткізу шеңберінде қазан-қараша айларында Қазақстан Республикасы Орталық сайлау комиссиясының мүшелері мен аппаратының қызметкерлері мәслихаттарда бос мандаттар қалыптасқан елдің барлық өңірлеріне барды.

Сапарлардың мақсаты – сайлау науқанына дайындық барысын тексеру. ҚР Орталық сайлау комиссиясы мәслихаттардың шығып қалған депутаттарының орнына сайлауды ұйымдастыру және өткізу кезінде аумақтық сайлау комиссияларына әдістемелік басшылықты, сондай-ақ олардың қызметінің «ҚР сайлау туралы» Конституциялық заңының талаптарына сәйкестігін бақылауды жүзеге асырады.

Барлық барған өңірлерде ағымдағы науқанға тартылған аумақтық және округтік сайлау комиссияларының мүшелерімен кеңестер мен оқыту семинар-тренингтері, сайлау заңнамасы мен сайлау рәсімдерін білуге бақылау тестілеуі өткізілді.

Оқытудың негізгі бағыттары: сайлау процесін ұйымдастыру, сайлау учаскелеріндегі комиссияның қызметі, тиісті заңдар мен нормативтік құқықтық актілердің талаптарын сақтау, дауыс беру процесінің ашықтығын қамтамасыз ету. Оқыту сайлау тәжірибесі мен сынақтан өткен шешім нұсқалары негізінде өзекті тақырыптар бойынша ықтимал кейстік жағдайларды пысықтауға мүмкіндік беретін практикалық бөлімді қамтыды.

Жоғарыда аталған іс-шаралар барысында алдағы сайлауға дайындық ерекшеліктері, азаматтардың, оның ішінде мүгедектігі бар адамдардың сайлау құқықтарын қамтамасыз ету мәселелері талқыланды.

Аумақтық сайлау комиссияларының төрағалары сайлау учаскелерін материалдық-техникалық жарақтандыру, олардың қолжетімділігін қамтамасыз ету, бюллетеньдерді уақтылы жеткізу жөніндегі өз жұмыстары туралы баяндады.

ОСК мүшелеріне сайлаушылар тізімдерімен, бюллетеньдермен жұмыс істеу, сондай-ақ байқаушылардың, кандидаттардың сенім білдірілген адамдарының, БАҚ өкілдерінің қызметіне жағдай жасау жөніндегі жұмыс туралы ақпарат берілді.

Барлық барған өңірлерде комиссия мүшелерінің кәсіби біліктілігі мен құқықтық құзыреттілігін арттыру қажеттілігіне баса назар аударылды.

Ақпарат көзі: Қазақстан Республикасы Орталық сайлау комиссиясы