ҚР Стратегиялық жоспарлау және реформалар агенттігінің төрағасы Жандос Шаймарданов Еуропалық қайта құру және даму банкінің, Дүниежүзілік банк пен Азия даму банкінің өкілдерімен кездесіп, 2029 жылға дейінгі Ұлттық даму жоспарын талқылады.

Іс-шара барысында қатысушыларға 2029 жылға дейінгі Ұлттық даму жоспарының жобасы таныстырылды.

Агенттік басшысы жоспардың негізгі басымдықтары мен индикаторларына тоқталды.

Жандос Шаймардановтың айтуынша, даму жоспары 17 басым бағытты және 80-ге жуық ұлттық индикаторды қамтитын 4 блоктан тұрады. Құжаттың басты мақсаты – ел экономикасының өсуін қамтамасыз ету арқылы халықтың әл-ауқатын арттыру.

Еуропалық қайта құру және даму банкінің Қазақстан бойынша директоры Хусейн Озхан елімізде орын алып жатқан экономикалық реформаларға қолдау білдіре отырып, ЕҚДБ экономиканы ырықтандыру, мемлекеттік-жекешелік әріптестік, Транскаспий халықаралық көлік бағыты, инфрақұрылымды дамыту және декарбонизация мәселелері бойынша ынтымақтастыққа және техникалық қолдау көрсетуге дайын екенін атап өтті.

Сонымен қатар, Дүниежүзілік банктің аға экономисі Наташа Шарма Ұлттық жоспардың мазмұнына тоқтала отырып, индикаторларды оңтайландыру және құжаттың бағыттарына басымдық беру бойынша өз ұсыныстарын енгізді.

Кеңеске ЕҚДБ өкілдері О.Хусейн, А.Намазбаев, Дүниежүзілік банктің өкілдері Я.Ермакова, Н. Шарма, С.Құсайынова, Н. Дэвид, Азия даму банкінің өкілдері И.Гуламов, Г.Рау қатысты.

Ақпарат көзі: Қазақстан Республикасының Стратегиялық жоспарлау және реформалар агенттігі