ҚР Стратегиялық жоспарлау және реформалар Агенттігінің Төрағасы Жандос Шаймарданов Дүниежүзілік банктің Еуропа мен Орталық Азиядағы өсу мен өркендеу мәселелері жөніндегі өңірлік директоры Асад Аламмен кездесу өткізді. Іс шара экономиканы ырықтандыру және ынтымақтастық перспективаларын талқылау мәселелеріне арналды.

Биылғы жылы «Экономиканы ырықтандыру жөніндегі шаралар туралы» және «Қазақстан Республикасының 2029 жылға дейінгі Ұлттық даму жоспарын бекіту туралы» Жарлықтар қабылданды. Жандос Шаймардановтың айтуынша, Мемлекет басшысы тұрақты, сапалы және инклюзивті өсу траекториясына шығу мақсатында экономикалық дамудың жаңа парадигмасын іске асыру қажеттілігін стратегиялық басымдықтар қатарына белгілеген.   

«Қазақстанның табысы жоғары елдер когортасына кіруі және «орташа табыс тұзағын» еңсеру үшін берік институционалдық және әлеуметтік-экономикалық негіздерді қалыптастыру орта мерзімді кезеңге арналған дамудың негізгі мақсаттары болып табылады» - деді Агенттік басшысы. 

Өз кезегінде Дүниежүзілік банктің өкілі елімізде жүргізіліп жатқан экономикалық реформаларға қолдау білдіріп, жаңа тәсілдер елдің бәсекеге қабілеттілігіне жағымды әсер ететінін атап өтті.

«Жақында Дүниежүзілік банк «World Development Report 2024» атты жыл сайынғы баяндамасын жариялады. Бұл зерттеу орташа табыс деңгейіне жеткен және жоғары дамыған экономикалық мәртебеге ұмтылып жатқан елдер үшін сапалы өсуді қамтамасыз етудің заманауи тұжырымдамасын ұсынады» - деді Асад Алам.  

Қорытындылай келе, тараптар жемісті ынтымақтастықты жалғастыруға келісті.

Ақпарат көзі: Қазақстан Республикасының Стратегиялық жоспарлау және реформалар агенттігі