Бүгін Стратегиялық жоспарлау және реформалар агенттігінің Төрағасы Жандос Шаймарданов Азия Инфрақұрылымдық Инвестициялар Банкінің вице-президенті Константин Лимитовскиймен кездесті. Кездесу Қазақстанмен ынтымақтастықтың перспективалық бағыттарын талқылауға арналды.

Агенттік басшысы Жандос Шаймарданов банк өкілдерін ведомствоның қызметімен таныстырып, елде жүзеге асырылып жатқан әлеуметтік-экономикалық реформалар туралы, сондай-ақ қабылданған 2029 жылға дейінгі Ұлттық даму жоспары мен «Экономиканы ырықтандыру жөніндегі шаралар туралы» Жарлығы жөніндегі стратегиялық жоспарлау құжаттары туралы айтты.  

Реформалар агенттігі төрағасының айтуынша, 2029 жылға дейін ҰДП шеңберінде инфрақұрылымдық даму мәселелеріне ерекше көңіл бөлінеді. «Атап айтқанда, Қазақстанның ірі өңірлік сауда-логистикалық хаб рөліндегі позициясын күшейту, Транскаспий халықаралық көлік бағытын одан әрі дамыту, Солтүстік-Оңтүстік бағытын масштабтау бойынша басымдықтар бекітілді. Бұл экономикаға көліктік және логистикалық үлесті ұлғайтуға ықпал ететін болады, бірақ сонымен бірге инфрақұрылымды кеңейтуді және жаңғыртуды, сондай-ақ еларалық кооперацияны талап етеді» - деді Жандос Шаймарданов.

Өз кезегінде Константин Лимитовский банктің Қазақстанда және басқа да Азия елдерінде жүзеге асырылып жатқан жобалары туралы хабарлады.

«Қазіргі уақытта біз Қазақстан үшін жаңа инвестициялық бағдарламаны әзірлеп жатырмыз, сонымен бірге бүкіл ел бойынша инфрақұрылымдық секторлардағы әлеуетті мүмкіндіктерді зерттеп үстіндеміз», - деп атап өтті ол.

Соңында тараптар өзара іс-қимыл мен ынтымақтастықты жалғастыруға келісті.

Ақпарат көзі: Қазақстан Республикасының Стратегиялық жоспарлау және реформалар агенттігі