Қазақстан Республикасының Жоғары Сот Кеңесінде ұлттық мереке – Республика күніне арналған салтанатты іс-шара өтті.

Жоғары Сот Кеңесінің Төрағасы Дмитрий Михайлович Малахов өзінің құттықтау сөзінде Республика күнінің еліміз үшін ең маңызды мерекелердің бірі екенін атап өтті.

«Бүгін біз жалпыұлттық бірлігімізді сақтап, оны нығайтып, қасиетті егемендігімізді құрметтеп, оған қорған боламыз.

Тәуелсіздігіміздің әр жылында біз одан әрі жетіліп, өз өзімізге сенімді және мықты болып барамыз.

Біз өз тарихымызды есімізде сақтап, бастан кешкен және жасаған істерімізді бағалаймыз, оң өзгерістер мен саяси тұрақтылықтың куәгері болып отырмыз.

Сіздердің кәсіби қабілеттеріңіз, өз істеріңізге деген адалдықтарыңыз соттарды қалыптастыру жүйесін одан әрі дамытуға және судьялардың тәуелсіздігі мен оларға қол сұғылмаушылық кепілдіктерін қамтамасыз етуге қызмет ететініне терең сенімдімін", – деп Д.М. Малахов атап өтті.

Іс-шара барысында Жоғары Кеңес мүшесі А. Б. Жакулинге мемлекеттік награда – «Құрмет» ордені табыс етілді.

Сонымен қатар, Жоғары Сот Кеңесінің мүшесі А. М. Нұрбеков және конкурстық іріктеуді ұйымдастыру және кадр резервін қалыптастыру бөлімінің меңгерушісі М. Б. Жақсылықов "Сот жүйесінің үздігі" белгісімен марапатталды.

ЖСК аппаратының, сондай-ақ ЖСК жанындағы Сот төрелігі академиясының бірқатар қызметкерлеріне Жоғары Сот Кеңесі Төрағасының алғыс хаттары табысталды.

Ақпарат көзі: Қазақстан Республикасы Жоғары Сот Кеңесі