Жезқазғанда құрылысы қарқынды жүріп жатқан денешынықтыру және сауықтыру кешенінің қасбетін жабу жұмыстары осы айдың соңына дейін толық аяқталады. Негізгі жұмыстардың атқарылуы бүгінгі таңда 45%-ды құрап отыр. Ұлытау облысы әкімі Берік Әбдіғалиұлының нысанда атқарылып жатқан жұмыстарды бақылауы кезінде ғимарат ішіндегі монолитті жұмыстардың аяқталу сатысында екендігі айтылды.

Қазіргі таңда нысанның сыртқы және ішкі жұмыстары қатар атқарылып жатыр. Ғимаратта гимнастика, жаттығу, бокс залдары мен үстел теннисіне арналған орын, ұзындығы 25 метр болатын 4 жолақты бассейн, әкімшілік бөлік сонымен қатар, екінші қабатта 320 орындық трибуна орнатылуда.

Өңір басшысы қазанда қолданысқа берілетін денешынықтыру және сауықтыру кешенінің аумағына су құбырын, кәріз желісі мен электрмен жабдықтау жүйесін кешіктірмей жүргізуді тапсырды.

Одан бөлек, құрылыс басында қосымша инженерлік желілер, бейнебақылау камералары, өртке қарсы қызмет және қашықтықтан басқару жүйесін тарту жұмыстары да жүргізіліп жатыр.

Ақпарат көзі: Ұлытау облысының әкімдігі