Нұрлан Ұранхаев облыстық Экономикалық тергеу департаментінің басшысы Нұрлан Кәрімовпен бірге қаладағы нысандарды аралады.

Семей қаласында Мәңгілік Ел көшесін абаттандыру жалғасуда. Авто суару жүйесі мен шамдар орнатылған, қажетті инженерлік желілер тартылған.

Аймақ басшысы «Орталық» қазандығынан Қайым Мұхамедханов көшесіндегі жылу коллекторына (ЖК), ЖК-ден орталық жылу пунктіне (ЦТП-8) дейінгі магистральдық желілерді қайта жаңарту барысымен танысты. Жоба аясында ұзындығы 1,8 шақырым жылу желілерін төсеу және жылу камераларын орнату көзделген.

ЦТП-507 жылу пункті мен орамішілік жылу желілерін қайта жаңарту жүргізілуде. ЦТП жылу пунктінде бөлшектеу жұмыстары аяқталған. 60 метрлік құбыр төселді, екі жаңа жылу камерасының құрылысы басталды.

Қуаты 20,6 Гкал/сағ болатын, көмірмен және сумен жылытылатын жаңа блок-модульді қазандықты орнату үшін Қарағайлы шағын ауданында 1,9082 гектар алаң бөлінді. Бұл жоба шағын ауданды жылумен үздіксіз қамтамасыз етуге және энергетикалық тиімділікті арттыруға мүмкіндік береді.

«Бұл жұмыстың барлығы қаланың инфрақұрылымын жақсартуға, халықтың өмір сүру сапасын арттыруға, тұрғындар үшін қолайлы жағдай жасауға бағытталған. Жұмыстардың орындалу барысы жеке бақылауымда болады», - деді әкім.

Оқушылар сарайының құрылысы да қарқынды жүргізілуде. Орталық 6 функционалды аймаққа бөлінеді, олардың әрқайсысында заманауи технологиялар қолданылады. Мұнда автотұрақ, жаяу жүргіншілерге арналған екі көпір өткелі болады. Балалардың қауіпсіздігі толық қамтамасыз етіледі. Нысанның аумағы - 9,8 мың шаршы метр. Жоба 2025 жылдың екінші тоқсанында аяқталады деп жоспарланған.

Облыс әкімі сондай-ақ жеке мәселесімен өтініш білдірген 88 жастағы қала тұрғыны Ғалия Бехтелованың үйінде болды.

Ақпарат көзі: Абай облысының әкімдігі