Сапар аясында Шығыс Қазақстан облысының әкімі Ермек Көшербаев «Өскемен титан-магний комбинаты» АҚ мен үнді мемлекеттік компаниясы IREL Limited және «IREUK Titanium Limited» арасында титан қожы өндірісі бойынша Қазақстан-Үнді бірлескен кәсіпорнын құру туралы келісім-шарттың ресми рәсіміне қатысты.

- Үндістан Шығыс Қазақстанның сыртқы саудасында динамикалық өсімді көрсетіп отыр. Бүгін біз Қазақстан мен Үнді арасындағы берік байланысты көрсететін маңызды кездесуде басымыз қосылып отыр. Өскемен титан-магний комбинаты мен үнді компаниясы IREL Limited арасындағы бірлескен кәсіпорын құру туралы келісімшарт біздің өзара әрекеттесуіміз үшін жаңа мүмкіндіктерді ашады және екі елдің дамуына елеулі үлес қосады. Бұл келісім біздің ортақ мақсаттарымызды атап көрсетеді және жоғары технологиялар мен тұрақты даму саласындағы басқа жобаларды жүзеге асыру үшін серпін береді, - деді облыс басшысы Ермек Көшербаев.

Бұл келісім «УКТМК» АҚ-ның шикізат базасын кеңейтуіне мүмкіндік береді, бұл Қазақстан титанының әлемдік нарықта бәсекеге қабілеттілігін арттыруға септігін тигізеді. Өз кезегінде, бұл Қазақстан мен Үнді Республикасының экономикалық өсімін және әл-ауқатын қамтамасыз етуге ықпал етеді.

«УКТМК» АҚ атынан келісімді компания президенті Асем Мамутова, ал IREL Limited компаниясы атынан басқарушы директор Дипендра Сингх мырза қол қойды.

Рәсімге Қазақстан Республикасының Индустрия және құрылыс вице-министрі Иран Шархан, Қазақстан Республикасының Үндістан Республикасындағы Төтенше және Өкілетті Елшісі Нурлан Жалғасбаев, Мумбайдағы ҚР Құрметті консулы Махендра Кумар Сангхи және Мумбайдағы ҚР Құрметті консулының орынбасары Ассиф Навруз, Шығыс Қазақстан облысының индустрия басқармасының басшысы Ардақ Мәдиев, Өскемен қаласы әкімінің орынбасары Нұрсұлтан Маратов, сондай-ақ «УКТМК» АҚ директорлар кеңесінің төрағасы Сильван Гелер мырза қатысты.

Ақпарат көзі: ГУ «Аппарат акима Восточно-Казахстанской области»