Бүгін елордадағы Қарулы күштердің Ұлттық әскери-патриоттық орталығында әскери қызметшілердің балалары арасында өткен «Отан – отбасынан басталады» атты шығармашылық байқаудың қорытындысы жарияланды.

Оған Қазақстанның барлық өңірлерінен 4 жастан 16 жасқа дейінгі 160 әскери қызметшінің баласы қатысты.

«Менің әкем қаһарман» номинациясында 4-6 жас аралығындағы мектеп жасына дейінгі балалар мен бастауыш сынып оқушыларының суреттері ұсынылды. Шығармалар, оның ішінде поэтикалық шығармаларды қамтыған «Менің кіші Отаным» номиниациясында 10-13 жастағы оқушылардың жұмысы қарастырылды. «Ешкім де ұмытылмайды, ешнәрсе де ұмыт қалмайды» тақырыбында 14 жастан 16 жасқа дейінгі жасөспірімдердің эсселері бағаланды. 

– Ұсынылған жұмыстардың ішінен үздігін таңдау қиынға соқты. Байқауға қатысушылардың барлығы өнерлерін көрсетіп, әскери мамандық туралы түсініктерін ашып, олардың ел мен халық үшін маңыздылығын көрсете білді, – деді марапаттау рәсімінде комиссия төрағасы, Қорғаныс министрлігі Тәрбие және идеологиялық жұмыс департаментінің басқарма бастығы полковник Серік Сейітбаев.  

Астана қаласының тұрғыны 5 жасар Азалия Боранқұлованың суреті «Менің әкем қаһарман» тақырыбындағы үздік жұмыс деп танылды. Комиссия екінші орынды Ақмола облысының Ақкөл қаласынан келген 4 жасар Василина Артемчикке, үшінші орынды шымкенттік 5 жасар Ислам Болатқа берді. Осы номинация бойынша бастауыш сынып оқушылары арасында елорда тұрғыны 7 жасар Әзиз Тұрғамбаев жеңіске жетсе, екінші орынды ақтаулық 9 жасар Сұлтан Жексембай иеленді, үшінші орынды 9 жасар астаналық Жасмина Әбдімаликова жеңіп алды.

«Менің кіші Отаным» номинациясы бойынша 12 жастағы балалар жүлделі орынды былайша бөліске салды: семейлік Әлихан Асғатов (1 орын), Талдықорған қаласынан келген Жанерке Қойшыбай (2 орын) және астаналық Ольга Ерастова (3 орын).

Жоғары сынып оқушылары арасында «Ешкім де ұмытылмайды, ешнәрсе де ұмыт қалмайды» атты эссенің мәні мен мазмұнын кеңінен ашып жазғандар ерекшеленді. Бұл номинация бойынша семейлік Сабина Төленова жеңімпаз атанды. Екінші орын астаналық Мерей Шалхарға бұйырса, үшінші орынға Талдықорған қаласынан келген Ақерке Қойшыбай табан тіреді.

Жеңімпаздар мен жүлдегерлер дипломдармен және сертификаттармен марапатталды. Іс-шара барысында балаларға балмұздақ таратылды. Мереке иелері үшін естелік сыйлықтар табысталып, ойындар мен конкурстар ұйымдастырылды.

Сонымен қатар, Қарулы күштер әскери қызметшілерінің отбасы мүшелерімен жұмысты ұйымдастыру бөлімінің басшысы Тәттігүл Смағұлованың айтуынша, елордалық балалар «Қуыршақ» театрына барып, KeruenCity Astana сауда орталығындағы Kinopark-те «Гарфильд» мультфильмін тамашалай алады.

Айтулы шара Ұлттық әскери-патриоттық орталықтың хореографиялық үйірмесінің концертімен аяқталды. Жас әртістер көрермендерге жарқын эмоциялар мен тамаша көңіл-күй сыйлады.

Мерекеге орай Мемлекеттік әскери-тарихи мұражай кеңес дәуіріндегі ойыншықтар қойылған ретро экспозицияны ұйымдастырғанын айта кетейік. Бір ай ішінде бірегей экспонаттармен толықтай танысуға мүмкіндік бар.

Ақпарат көзі: Министерство обороны Республики Казахстан