Бүгін Ыстамбұлда Түркі мемлекеттері ұйымына мүше мемлекеттердің Сот кеңестері төрағаларының Екінші кездесуі аясында тығыз ынтымақтастық және одан әрі өзара іс-қимыл мәселелері жөніндегі қорытынды декларацияға қол қоюдың ресми рәсімі өтті.

Декларацияға Түркия Республикасы судьялар және прокурорлар Кеңесі Төрағасының міндетін атқарушы М.Экинджи, Қазақстан Республикасы Жоғары Сот Кеңесінің Төрағасы Д.Шипп, Әзірбайжан Республикасы Сот-құқықтық кеңесінің Төрағасы И.Каримов, Қырғыз Республикасы Судьялар кеңесінің Төрағасы Қ.Джунушпаев, Өзбекстан Республикасы Жоғары Сот Кеңесінің Төрағасы Х.Едгоров және Түркі мемлекеттері ұйымының Бас хатшысы К.Омуралиев қол қойды.

Тараптар сот төрелігін тек құқықтық мемлекетте ғана жүзеге асыруға болатынын, ал сот жүйесі бейтарап болуға тиіс екенін, бұл ретте тәуелсіз Сот кеңестері сот жүйесінің мызғымастығының кепілі болып табылатынын атап өтті. Делегация басшылары одан әрі ынтымақтастыққа жәрдемдесуге және сот жүйелерінің кадр саясаты саласындағы өзара іс-қимылды нығайтуға келісті.

Халықаралық құжатқа қол қою барысында Сот кеңестері басшыларының үшінші отырысы 2025 жылы өтетіні белгілі болды. Қабылдаушы тарап Түркі мемлекеттері ұйымына мүше мемлекет болып табылатын Әзірбайжан Республикасы болады.

Жоғары Сот Кеңесінің Аппараты

Ақпарат көзі: Қазақстан Республикасы Жоғары Сот Кеңесі