2024 жылғы 7 қарашада Қазақстан Республикасы Төтенше жағдайлар министрлігінде ТЖ министрі, генерал-майор Шыңғыс Әрінов Словакия Республикасының Премьер-Министрінің орынбасары – Қорғаныс министрі Роберт Калиняк басқарған Словакиялық делегациясымен алғашқы жұмыс кездесуі өтті.

  Кездесу барысында тараптар азаматтық қорғау және қауіпсіздік саласындағы екіжақты ынтымақтастықты кеңейту перспективаларын талқылады. Атап айтқанда, төтенше жағдайларға дайындықты арттыру үшін тәжірибе алмасу және жаңа технологияларды енгізу мәселелеріне ерекше назар аударылды.

  Төтенше жағдайлар министрі генерал-майор Шыңғыс Әрінов министрлік халықаралық серіктестермен тәжірибе алмасуға мүдделі екенін атап өтті. «Біз су тасқыны мен жер сілкінісі сияқты табиғи апаттардың алдын алу және салдарын жою саласындағы тәжірибемізбен бөлісуге дайынбыз және осындай жағдайларға дайындықты арттыру мақсатында бірлескен бастамаларға белсене қатысуды жалғастырамыз», – деп атап өтті министр.

  Сондай-ақ, тараптар екіжақты ынтымақтастықтың басқа да маңызды аспектілерін, атап айтқанда, ақпарат алмасу, төтенше жағдайларда әрекет ету координациясы және екі елдің құтқару қызметтерінің тиімділігін арттыру мақсатында бірлескен оқу-жаттығулар мен тренингтер ұйымдастыру мәселелерін талқылады.

  Словакия Республикасының Қорғаныс министрі Роберт Калиняк азаматтық қорғау және қауіпсіздік саласындағы серіктестікті одан әрі нығайтуға қызығушылық білдіріп, төтенше жағдайларға дайындықты арттыруға бағытталған бірлескен жобаларды жүзеге асыруға дайын екендігін атап өтті.

Ақпарат көзі: Министерство по чрезвычайным ситуациям Республики Казахстан