ӨЗБЕКСТАН РЕСПУБЛИКАСЫ АРХИВТЕРІНІҢ КҮНДЕРІ ҚАЗАҚСТАНДА ӨТУДЕ

  М.Әуезов атындағы ОҚУ-да Өзбекстан Республикасы архивтерінің Қазақстан Республикасындағы күндері басталды. Әуезов университетінің қолдауымен өтіп жатқан іс-шара аясында екі елдің мәдениет, өлкетанушы, архив саласының өкілдері мен ғалымдары «Қазақстан мен Өзбекстан тарихының зерттеуінің өзекті мәселелері» тақырыбында оқу ордасының базасында халықаралық ғылыми-тәжірибелік конференцияда бас қосты.

  Алдымен Қазақстан мен Өзбекстан Республикаларының архивтерінде сақталған құжаттар бойынша көрмелердің тұсаукесері өтті. Онда конференцияға қатысушылар тарихқа қатысты архивтерде сақталған тың деректермен танысты.

  Іс-шараның мақсаты – архив ісі бойынша екі ел арасындағы ынтымақтастықты дамытып, архивтерді дамытудың инновациялық идеяларын қалыптастыру және тәжірибе алмасу.

  «Қазақстан мен Өзбекстан арасында архив саласында зерттеу жұмыстары көп. Бұл ынтымақтастық ары қарай жалғасады деген сенімдеміз», - деді Өзбекстанның Архив, құжаттама және кітап ісі комитеті және «Узархив» агенттігі жетекшісі Анваржан Алиев.

  Конференцияда тарихты зерттеудегі архив құжаттарының орны мен рөлі, архив саласының жағдайы және даму перспективалары, архивтік құжаттардың сақталуын қамтамасыз етудің заманауи технологиялары тақырыбында баяндамалар оқылды.

  Сондай-ақ сала өкілдері мен ғалымдары «Қазақстан мен Өзбекстан»: екі ел арасындағы архив саласын дамыту аспектілері атты» дөңгелек үстелде өзекті мәселелерді талқылады.

Ақпарат көзі: Қазақстан Республикасы Ғылым және жоғары білім министрлігі