Ақтөбе облысының әкімі Асхат Шахаров Қарғалы ауданының активімен кездесу өткізді. 

Кездесу барысында Қазақстан Республикасы Президентінің Әкімшілігі мен Қарғалы аудандық мәслихатының келісімімен тағайындалған ауданның жаңа әкімі Нұрлыбек Өнербаев таныстырылды. 

«Қарғалы ауданы – облыс экономикасының дамуына үлесін қосып отырған облысымыздағы аудандардың бірі болып саналады. Бүгінде аудан экономикасы Мемлекет басшысының тапсырмаларын  орындаудың арқасында бірқалыпты дамып келеді. Десек те, аудан басшылығы әлеуметтік-экономикалық даму көрсеткіштерінің 100% орындалуын, сонымен қатар өсімін қамтамасыз ету үшін тиісті шаралар қабылдау қажет», - деп атап өтті Асхат Шахаров. 

Биылғы жылдың 7 айында ауданның өнеркәсіп, ауыл шаруашылығы, құрылыс, тұрғын үйді пайдалануға беру саласындағы әлеуметтік-экономикалық көрсеткіштерінде оң нәтиже байқалады. Ал инвестиция тарту төмендеген.

«Инвестициялар тарту және шағын орта бизнесті дамыту есебінен жаңа жұмыс орындарын ашуды қолға алу керек. Аудан аумағында темір, никель рудасы, құрылыс тастары, қиыршық тас пайдалы қазбалары бойынша бос кен орындары бар. Тау-кен өнеркәсібі саласы баяу дамуда. Сондай-ақ, ауданның өңдеу өнеркәсібінің жалпы облыстағы үлесі тек 0,2% - ды құрайды. Аталған саланың дамуы бәсең. Соңғы 2 жылда өңдеу өнеркәсібіне мүлдем инвестициялар тартылмаған. Осыған орай, өңдеу өнеркәсібіне инвестиция тарту керек», - деді Асхат Шахаров.

Жаңа басшы суармалы егіншілік, картоп және көкөніс дақылдарының алқаптарын ұлғайту, ет өнімдерін өндіру, өңдеу цехтарын және ет кластерін, жол бойындағы шағын орта бизнесті одан әрі дамыту, отандық туризмнің өркендеуіне үлес қосу бағытында да жұмыстарды қолға алуы тиіс.  Жол сапасы мен абаттандыру мәселесі де өзекті.

«Аудан әкіміне осы тапсырмаларды қатаң бақылауда ұстап, орындалуын қамтамасыз етуді тапсырамын. Ең басты міндет – тұрғындардың әл-ауқатын жақсарту, жұмыс орындарымен қамтамасыз ету», - деп өңір басшысы сөзін түйіндеді.

Ақпарат көзі: ГУ «Акимат Актюбинской области»