Жаңа пруденциялық норматив – қарыз алушының кірісіне қатысты қарыз коэффициентін енгізу туралы
Жаңа пруденциялық норматив – қарыз алушының кірісіне қатысты қарыз коэффициентін енгізу туралы
Қаржы нарығын реттеу және дамыту агенттігі (бұдан әрі – Агенттік) «Банктің пруденциялық нормативтерінің және сақталуы міндетті өзге де нормалары мен лимиттерінің нормативтік мәндері мен оларды есептеу әдістемелерін, капиталының мөлшерін және Ашық валюталық позицияны есептеу қағидалары мен оның лимиттерін белгілеу туралы» Қазақстан Республикасы Ұлттық Банкі Басқармасының 2017 жылғы 13 қыркүйектегі № 170 қаулысына және «Пруденциялық нормативтердi және микроқаржылық қызметті жүзеге асыратын ұйымның сақтауы мiндеттi өзге де нормалар мен лимиттердi, оларды есептеу әдістемесін бекіту туралы» Қазақстан Республикасы Ұлттық Банкі Басқармасының 2019 жылғы 14 қарашадағы № 192 қаулысына өзгерістер мен толықтырулар енгізу туралы» Агенттік Басқармасының 2024 жылғы 16 тамыздағы №63 қаулысын (бұдан әрі – Қаулы) қабылдады.
Қаулы ағымдағы жылы 19 маусымда Мемлекет басшысы қол қойған «Қазақстан Республикасының кейбір заңнамалық актілеріне кредит беру кезінде тәуекелдерді барынша азайту, қарыз алушылардың құқықтарын қорғау, қаржы нарығын реттеуді және атқарушылық іс жүргізуді жетілдіру мәселелері бойынша өзгерістер мен толықтырулар енгізу туралы» Қазақстан Республикасының Заңын іске асыру үшін қабылданды.
Қаулымен жаңа пруденциялық норматив – қарыз алушының кірісіне қатысты коэффициент есебінен банктер мен микроқаржы ұйымдарының пруденциялық нормативтерінің құрамы кеңейтіледі.
Борыштың қарыз алушының кірісіне қатысты коэффициенті барлық кредит бойынша жалпы берешектің қарыз алушының жылдық кірісіне қатынасы ретінде есептеледі. Осылайша, қарыз алушының барлық кредиті бойынша жиынтық берешек оның жылдық кірісіне қарай шектелетін болады.
Қарыздың қарыз алушының кірісіне қатысты коэффициенті қарыз алушының ай сайынғы кірісінің 50%-ы деңгейінде қарыз алушының мерзімді төлемдерін шектейтін қарыз алушының борыш жүктемесінің қолданыстағы коэффициентіне қосымша пайдаланылады.
Агенттік бірінші кезеңде банктер мен микроқаржы ұйымдарының ақпараты негізінде қарыз алушының кірісіне борыш коэффициентінің нақты мәндеріне мониторинг жүргізетін болады. Екінші кезеңде (2025 жылы) коэффициенттің нормативтік мәні белгіленеді.
Жаңа норматив азаматтардың борыш жүктемесінің шамадан тыс өсуін шектеуге және қарыз алушылардың кірістерінен бірнеше есе асатын кредиттер беруге жол бермеуге мүмкіндік береді.
Сыртқы коммуникациялар басқармасы
+7 (727) 237 1089
Ақпарат көзі:
Біздің Telegram арнамызға жазылыңыз және барлық маңызды оқиғалардан хабардар болыңыз, мына сілтеме -
