Талдықорғанда Наурыз мерекесіне орай алғаш реет «Жетісу салбурыны – 2025» республикалық турнирі өтті. Оған еліміздің әр өңірінен 12 команда – 54 құсбегі қатысты, - деп хабарлайды Жетісу облысы әкімінің баспасөз қызметі.

«Жетісу саятшылары» ұлттық спорт түрлері федерациясының президенті Бүркітбай Файзолла құттықтау сөз сөйледі:

 - Саятшылықты ұлттық мақтанышымыз ретінде сақтап, ұрпақтарға жеткізу – бүркітшілердің міндеті. Біз бұл бірегей өнерді ЮНЕСКО-ның материалдық емес мәдени мұра тізіміне енгізу үшін бар күшімізді саламыз. Осы ұлттық спорт түрін, осы дәстүрлерді одан әрі дамыту жолындағы жұмысымызды жалғастырамыз, - деді ол.

Құсбегілер сайыстың негізгі кезеңдерінде бүркітті қолға шақыру және шырғаға салу бойынша бақ сынады.

Жарыс қорытындысы бойынша «Бүркіт» номинациясында атыраулық Арман Кушкаров І орын, Алматы облысының бүркітшілері Алмас Сейітжан ІІ орын, Өмірхан Баетбайпен Сейітжан Бексұлтан ІІІ орынды иеленді.

Ал «Қаршыға» аталымында жамбылдық Берікболсын Бабажан алтын, алматылық Аян Сейітжан күміс, Жамбыл облысынан келген Бақдәулет Бабажан мен Алматы облысының саятшысы Бекнияз Қуанышбаев қола медальға ие болды.

Қарағандылық Таңат Оспанқұлов «Ителгі» номинациясында үздік шығып, І орын алса, ІІ орын жетісулық Кісей Әбдікәрімге, ІІІ орын Алматы мен Астана қалаларынан келген Ерасыл Серікбекұлымен Сұлтансері Есентаевқа берілді.

Жүлдегерлердің бәрі кубоктар, грамоталар, сол сияқты ақшалай сыйлықтармен марапатталды.

Жетісу облысы әкімінің баспасөз қызметі.

Ақпарат көзі: Жетісу облысының әкімдігі