Сарыөзек гарнизонының «Көктал» оқу-жаттығу полигонында артиллерия бөлімшелерімен бір айлық далалық жиын өтіп жатыр. 

Далалық сабақтар командирлер мен жеке құрамның атыс дайындығын, түрлі міндеттерді орындау кезінде жауынгерлік үйлестіруді жетілдіруге бағытталған. Жиынға үш жүзге жуық әскери қызметші қатысуда, оның жүзі мерзімді әскери қызметші. Бұл сарбаздар алғашқы жауынгерлік атыстарға қатысады.

Артиллеристер Д-20, D-30, Mста-Б гаубица зеңбіректерінен және БМ-21 «Град» дүркіндетіп ататын реактивті жүйелерінен оқ атумен қоса жүзден астам түрлі атыс тапсырмаларын орындады. Тактикалық жаттығуларда олар артиллеристердің марштағы іс-әрекеттері, атыс позицияларының орналасуы мен бүркемеленуі, нысаналарды барлау және атысты басқаруы сынды нормативтерді пысықтады.

– Біздің қарулар «қарсыластың» байланыс жолағынан алыс тұрды. Дегенмен, біз снарядтармен алыс қашықтықтағы нысандарды жойдық. Мұнда теориялық білімді іс жүзінде пайдаландық. Біздің есептоп жақсы нәтиже көрсетіп, жоғары бағаланды, – деді аға көздеуші қатардағы жауынгер Елдар Ескендіров.  

Сабақ барысында навигациялық құралмен, артиллериялық баллистикалық станциямен және байланыс құралдарымен жұмыс істеуге ерекше көңіл бөлінеді. Әскери қызметшілер артиллериялық атысты барлау және реттеу әдістемелерін зерделейді. Даладағы тактикалық сабақтарда артиллерист офицерлер түрлі атыс позицияларынан және жоғары дәлдікті оқ-дәрілерді қолдана отырып, жеке жауынгерлік ату тапсырмаларын орындаудан машығын жетілдіреді.

Бағдарламада сонымен қатар қару командирлері лауазымдарын атқаратын мерзімді қызметтегі сарбаздар жиыны да қарастырылған. Далалық жиынның қалған уақытында артиллеристер саптық және спорттық дайындықты жетілдіріп, атыс жаттығуларын жалғастырады.

Ақпарат көзі: Министерство обороны Республики Казахстан