Жетісу облысында 2024 жылдың соңына дейін Көксу, Қаратал, Ескелді аудандары мен Талдықорған қаласында тағы 30 елді мекен газға қосылады, 433 км газ тарату желілері салынады. Бұдан басқа, жалпы сомасы 25,7 млрд. теңгеге 42 жобалау-сметалық құжаттама әзірленді, - деп хабарлайды Жетісу облысы әкімінің баспасөз қызметі.

Облыстық энергетика және тұрғын үй-коммуналдық шаруашылығы басқармасының мәліметіне қарағанда, бүгінгі таңда Жетісу облысында газдандыру деңгейі 46% құрап отыр. Яғни, 33 елді мекен газдандырылып, 327 мың адам газға қол жеткізген. Биылғы жылдың соңына дейін тағы 30 елді мекен газға қосылады. Соның 22-сі – өткен жылдан өтпелі, 8-і – жаңа жоба. 

"Газдандырудың екінші кезеңінде Ақсу, Сарқан және Алакөл аудандарының елді мекендерін табиғи газбен қамтамасыз ету жоспарланып отыр. Бүгінгі таңда құны 131,7 млрд. теңге құрайтын «Талдықорған – Үшарал» магистральдық газ құбыры құрылысының жобалау-сметалық құжаттамасы әзірленді. Жобада ұзындығы 302,0 км, 6 АГРС орната отырып, магистральдық газ құбырын салу көзделген, бұл 124 мың тұрғыны бар тағы 66 елді мекенді газға қосуды ұлғайтуға мүмкіндік береді. Жобаны іске асыруды осы жылдың II жартысында бастау жоспарлануда. Жобаның аяқталу мерзімі 2028 жылдың 3 тоқсаны", - делінген басқарманың хабарламасында.

Жетісу облысы әкімінің баспасөз қызметі.

Фотосуреттер облыс әкімі баспасөз қызметінің архивінен алынды.

Ақпарат көзі: Жетісу облысының әкімдігі