Ағымдағы жылғы 7 қарашада Жоғары Сот Кеңесінің мүшесі Н.У.  Сисенова Парламент Сенатының жалпы отырысына қатысты.

Отырыста екі оқылымда депутаттар бастамашылық еткен сот жүйесін реформалау және іс жүргізу заңнамасын жетілдіру туралы заң жобасы қаралды.

Заң жобасында Қылмыстық-процестік кодексiне, Азаматтық процестік кодексіне, Әкімшілік рәсімдік-процестік кодексіне, сондай-ақ бірқатар басқа да заңдарға, оның ішінде қылмыстық процестің белгіленген рәсімдерін айналып өтіп, судьяларды тәртіптік жауапкершілікке тарту үшін жедел-іздестіру қызметінің материалдарын пайдалануға тыйым салуды белгілеу бөлігінде түзетулер көзделеді.

Отырыс барысында Н.У. Сисенова Парламент Сенаты депутаттарының судьялардың тәртіптік жауапкершілігі, кассациялық соттарға судьялар корпусын қалыптастыру процесі, сот төрелігі академиясының әлеуеті туралы, сондай-ақ тұтастай алғанда азаматтардың сот жүйесіне деген сенімін арттыру бойынша қабылданып жатқан шаралар туралы сұрақтарына жауап берді.

2024 жылғы 1 қазаннан бастап істерді қарау кезінде заңды өрескел бұзудың әрбір фактісі Сот жюриінің қарау нысаны болады.

Сенаторлардың сұрақтарына жауап бере отырып, Н.У. Сисенова мыналарды атап өтті:

«Бүгінгі таңда Сот жюриіне заңдылықты өрескел бұзған судьяларға қатысты жаңа тетік бойынша материалдар келіп түспеген.

Бұл материалдарды жіберу үшін жоғары тұрған сот сатысының тиісті құжатты шығаруы, сондай-ақ облыстық соттардың жалпы отырыстарының қорытындысы қажеттігіне байланысты.

Сондықтан жаңа формат бойынша материалдардың түсуі осы айда күтілуде.

Осыған байланысты бұл жұмыстың нәтижелеріне баға беруге әлі ерте.

Бұл шаралардың барлығы азаматтардың сот жүйесіне деген сенім деңгейін арттыруға және сот төрелігін жүзеге асыру сапасын жақсартуға мүмкіндік беретіні сөзсіз».

Отырыс аяқталғаннан кейін Н.У. Сисенова журналистердің сұрақтарына толық жауап берді.

Ақпарат көзі: Қазақстан Республикасы Жоғары Сот Кеңесі