2024 жылғы 12 қыркүйекте Жоғары Сот Кеңесінің кезекті отырысы өтті, онда сот жүйесінің ұйымдық-кадрлық мәселелері қаралды.

Отырыс шеңберінде талқылау қорытындысы бойынша Жоғары Сот Кеңесі зейнеткерлік жасқа толған Қарағанды облысы аудандық сотының судьясына одан әрі судьялық қызметте болудан бас тартты.

Бұдан басқа, Кеңес мүшелері Алматы және Қостанай облыстарының аудандық соттары төрағасының және екі судьясының Сот жюриінің шешімдеріне шағымдану туралы өтініштерін қарады. Талқылау қорытындысы бойынша барлық шешімдер негізді деп танылды.

Отставкаға кетуіне, зейнеткерлік жасқа толуына, басқа жұмысқа ауысуына байланысты, өз еркімен, Сот жюриінің шешімі бойынша және соттың айыптау үкімінің заңды күшіне енуіне байланысты қызметтен босатуға 24 судья ұсынылды.

Сонымен қатар, сот төрағасы лауазымындағы өкілеттік мерзімінің өтуіне байланысты аудандық соттардың екі төрағасын атқаратын лауазымдарынан босату туралы ұсынымдар берілді, оның біреуі осы соттың судьясы қалдырыла отырып, екіншісі – тең мәнді соттың судьясын конкурссыз тағайындаумен.

Сондай-ақ, отырыс шеңберінде Кеңес судья лауазымына алғаш тағайындалған және кәсіби қызметін бағалаудан сәтті өткен 63 судьяның бір жылдық жұмысының нәтижелерін бекітті.

Жоғары Сот Кеңесінің Аппараты

Ақпарат көзі: Қазақстан Республикасы Жоғары Сот Кеңесі