БАҚ қызметкерлері күні қарсаңында ТЖД қызметкерлері өздері қызмет атқаратын аумақта «Құтқарушылармен бір күн!» тақырыбындағы шара ұйымдастырып, БАҚ өкілдерінің есінде көпке дейін сақталатындай қызықты әрі шытырман оқиғаларға толы шара ұйымдастырды.

Қалам мен микрофоннан өзге ауыр ештеңе ұстап көрмеген тілшілер қауымы өртті сөндіруде, шабуыл сатыларымен көтерілуде, зардап шегушіні биік ғимараттан түсіруде және алғашқы медициналық көмек көрсету бойынша өз күштерін сынап көрді. Сондай-ақ құтқарушы сүңгуірлер киімін киіп көріп, тіпті су астына да түсті. Өрт сөндіруші және құтқарушы болу қаншалықты қиын екенін түсіну үшін түтін камерасында сынақтан да өтті.

Осылайша іс-шараға қатысушылар төтенше жағдайларда белсенді әрекет етуге тырысып бақты.  

Іс-шараға қазылар алқасы ретінде облыстың ТЖД басшылығы мен бөлімшелердің өкілдері қатысты.  

Департамент бастығы Арман Тоқанов атап өткендей, төртінші билік өкілдері халықтың қауіпсіздік мәдениетін қалыптастыруға айтарлықтай үлес қосып, құтқарушылар туралы қоғамда оң пікір қалыптастыруға ықпал етті.

Сондай-ақ, ол квест қатысушыларын БАҚ қызметкерлері күнімен құттықтап, жоғары кәсібиліктері үшін және Отандық журналистиканың үздік дәстүрлерін сақтағаны және одан әрі дамыту жолындағы тынымсыз еңбектері үшін шын жүректен алғысын білдірді. Облыстың бас құтқарушысы бүгінгі кездесудің журналистер мен құқық қорғау органдарының баспасөз қызметтерін халық игілігіне бірлесе жұмыс атқаруға және өзара түсіністікке бағытталғанын тілге тиек етті.

Іс-шара соңында ойынға қатысушыларға түрлі номинациялар бойынша, яғни белсенді қатысқандары үшін және қауіпсіз жүріс-тұрыс ережелерін барынша насихаттағандары үшін арнайы грамоталар табысталды. Осылайша, «Нағыз өрт сөндірушілер» атағын «Отқа төзімді» командасы иеленсе, «Үздік құтқарушылар» номинациясы бойынша полиция департаментінің «Арландар» командасы, «Нағыз медициналық құтқарушылар» номинациясы бойынша «Қырандар» командасы үздік атанды.

Сондай-ақ, жергілікті баспасөз басылымдары, телеарналар және өңірлік медиа холдингтің ұжымдары алғыс хаттармен марапатталды.

  Жамбыл облысы ТЖД баспасөз қызметі

Ақпарат көзі: Министерство по чрезвычайным ситуациям Республики Казахстан