Алматы қаласында Savvy Business sLTD және Каподистрия атындағы Афины ұлттық университеті бірлесіп ұйымдастырған инклюзивті білім беру бойынша ауқымды тренинг басталды. 9 күндік тренингке 94 университет оқытушылары мен мектеп педагогтары қатысуда.

Оқыту көптеген практикалық және интерактивті сабақтарды қамтиды, сондай-ақ педагогтар әдістер мен тәжірибелермен танысады. Атап айтатын болсақ, инклюзивті білім беру, ерекше білім беру қажеттіліктері бар білім алушылар, инклюзивті білім берудегі бірлескен тәжірибелер, оқытуға арналған әмбебап дизайн, сараланған оқыту, ерекше білім беру қажеттіліктері бар білім алушыларға психологиялық-педагогикалық қолдау көрсету әдістемесі, жеке білім беру бағдарламалары және жеке инклюзия жоспарларын пайдалану сияқты әдістер мен тәжірибелер ұсынылады.

Тренинг Дүниежүзілік банктің қолдауымен ҚР Ғылым және жоғары білім министрлігі іске асыратын «Орта білім беруді жаңғырту» жобасы шеңберінде ұйымдастырылды. Инклюзивті білім беру бойынша оқыту ағымдағы жылдың 22 мамырына дейін жалғасады.

Ақпарат көзі: Қазақстан Республикасы Ғылым және жоғары білім министрлігі