Елорда тұрғындары «JOLTAP» жобасы аясында цифрлық және жұмысшы мамандықтарды тегін меңгеріп жатыр, деп хабарлайды Астана әкімдігінің ресми сайты.

Қазіргі уақытта 2 мыңнан астам астаналық түрлі мамандық бойынша оқу курстарынан өтті. Олардың бірі – Аңсар Шұғаев, ол баристадан сабақ алып, әріптесінің арқасында бағдарлама туралы хабардар болды.

«JOLTAP» жобасынан өткенге дейін мейрамхана бизнесінде сату бойынша аға менеджер болып жұмыс істедім. Менің әріптесім осы бағдарламаны оқып, кофеханасын ашты. Ол маған жоба туралы айтып, оқудан өтуге кеңес берді. Мен қызығушылық танытып, өтініш қалдырдым. Осылайша көп ұзамай оқуым басталды. Осының арқасында өзімнің кофе бизнесімді ашуды жоспарлап жүрмін», — дейді бағдарлама түлегі.

Аңсар Шұғаев оқытушының арқасында қысқа мерзімде мамандық меңгергенін айтты.

«Осындай курстардың көмегімен бағытыңды түбегейлі өзгертуге болады. Айта кету керек, оқыту барысында барлық мүмкіндікті көрсеткен, теорияларын айтып, кеңестерімен бөліскен оқытушы Тұрар Ілиястың арқасында оңай өтті. Біз кофе бизнесін ашуды, жұмыс істеуді, кофе дайындауды және көп жаттығуды үйрендік. Оқуды бітіргеннен кейін қатысушылар алған білімдерін тексеру үшін тестілеуден өтуі керек болды. Егер қате жіберілсе, мұғалім көмектесіп, жол көрсетті. Тестілеу кезінде біз алдымен сұрақтарға жауап беру арқылы теориядан өттік. Практикалық бөлімде кофені қалай дайындау және қызмет ету керектігін көрсеттім. Бәрі тез және оңай өтті. Себебі өзіме сенімді болдым. Ең бастысы, ұялмай, сұрақтар қою керек», - деп бөлісті қала тұрғыны.

Аңсар қысқа мерзімді курстың соңында сертификат алып, жұмысқа орналасты. Бағдарлама түлектерге бос жұмыс орындарын ұсыну арқылы жұмыс табуға көмектеседі.

«Кофеханада әріптестерім жұмысыма риза болып, қай жерде оқығанымды сұрайды. Мен бағдарлама туралы айтып, барлық мәліметті айттым. Таныстарым оқығанына қуанып жүр. Менің ойымша, жоба қаржылық проблемалары бар адамдарға тегін оқуға мүмкіндік береді. Жеделдетілген оқыту уақытты үнемдейді. Басқа өңірлерден келген адамдар қосымша білім алуы үшін бағдарламаны бүкіл Қазақстан бойынша ашу керек деп санаймын. Мамандығыңызды өзгертуден қорықпаңыз. Мұның бәрі адамға байланысты. Ең бастысы – әрекет ету және мақсатқа жету», - деп қосты ол.

Естеріңізге сала кетейік, «JOLTAP» жобасы Астана қаласы әкімдігінің бастамасымен жүзеге асып жатыр. Оған 18 жастан 50 жасқа дейінгі астаналықтар қатыса алады.

JOLTAP жобасының басты мақсаты – елорда тұрғындарына табысын, сондай-ақ кәсіби біліктілігін арттыруға көмек көрсету.

Ақпарат көзі: ГУ «Аппарат акима города Астана»