Елордадағы Ж.Үшкемпіров атындағы «Жекпе-жек» сарайында «CHILDREN PARALYMPIC GAMES 2024» атты инклюзивті спорт фестивалінің ашылуы салтанаты өтті. Оған Қазақстанның 23 қаласынан 400-ге жуық ерекше қажеттіліктері бар балалар мен жастар қатысады, деп хабарлайды елорда әкімдігінің ресми сайты.

Дәстүрлі түрде өтетін фестиваль осымен бесінші жыл қатарынан «Тең мүмкіндіктер әлемі» қоғамдық қоры мен Қазақстан бочча федерациясының бастамасымен ұйымдастырылып отыр. Екі күнге созылатын фестиваль мүгедек жастарды дене шынықтырумен және спортпен жүйелі түрде айналысуға, жасөспірімдер арасында белсенді өмір салтын нығайтуға және әлеуметтік белсенділікті, сенім мен өзара сыйластықты арттыруға бағытталады. Аталмыш сайыстың ерекшелігі – мұнда тек ерекше қажеттілігі бар балалар ғана емес, дені сау құрдастары да қатысып, бақ сынай алуында.

«Samruk-Kazyna Trust» қоры бірнеше жылдан бері елімізде адаптивті спорт үйірмелерінің ашылуына қолдау көрсетіп келеді. Жыл сайын Астана қаласында адаптивті спорт саласында жетістікке жетіп, ерекше көрсеткіштерге қол жеткізген жас спортшылармен үнемі кездесу өткіземіз. Бүгінде айтулы сайыс аясында сіздермен көріскеніме қуаныштымын!» – деді фестивальге бас демеуші болған «Samruk-Kazyna Trust» қорының бас директоры Альфия Адиева.

Церебральды сал ауруы, көру, есту қабілетінің бұзылуы, Даун синдромы, аутизм, бұлшықет дистрофиясы, сөйлеу дамуының кешігуі сияқты диагноздары бар спортшылар топтарға бөлініп, тең физикалық және интеллектуалды мүмкіндіктерді ескере отырып, өзге қатысушылармен бәсекелеседі.

«CHILDREN PARALYMPIC GAMES 2024» жарысы өңір-өңірде қалалық деңгейде өтіп, бүгінде үздіктер республикалық додада жарысады. Оның ішінде бочча, голбол, адаптивті шығыс жекпе-жегі (каратэ, таэквондо, дзюдо), адаптивті футбол, адаптивті жүзу, жеңіл атлетика, үстел теннисі секілді спорт түрлері бойынша сайысады. Сондай-ақ, спорт фестивалі аясында 7 қаладан «инклюзивті хорегорафия» үйірмелерінің тәрбиеленушілері арасында инклюзивті би байқауы өтеді. Екі күнге созылатын фестиваль мүгедек жастарды дене шынықтырумен және спортпен жүйелі түрде айналысуға, жасөспірімдер арасында белсенді өмір салтын нығайтуға және әлеуметтік белсенділікті, сенім мен өзара сыйластықты арттыруға бағытталады», – деді фестиваль ұйымдастырушысы және «Тең мүмкіндіктер әлемі» қоғамдық қорының директоры Нұргүл Ұлжекова.

Ақпарат көзі: ГУ «Аппарат акима города Астана»