Астана, 2024 жылғы 21 мамыр – Қазақстан мен Германия арасындағы мәдени-гуманитарлық ынтымақтастықты күшейту, сондай-ақ еліміздегі неміс этносының тұрмыс-тіршілігін талқылау мақсатында бүгін елордада Қазақстан Республикасында тұратын этникалық немістердің мәселелері жөніндегі Қазақстан-Германия үкіметаралық комиссиясының 20-шы отырысы өтті.

Отырыс қазақ тарапынан Сыртқы істер министрінің орынбасары Роман Василенко, герман тарапынан Бундестаг депутаты, Федералдық үкіметтің қоныс аударушылар және азшылық ұлттар істері жөніндегі өкілетті уәкілі Натали Павликтің төрағалығымен өтті. Комиссия жұмысына екі елдің салалық министрліктері мен ұйымдарының, сондай-ақ «Возрождение» Қазақстанның немістері бірлестігі» Қоғамдық қорының өкілдері де қатысты.

Іс-шараның күн тәртібі бойынша тараптар Қазақстан мен Германия арасындағы ынтымақтастық және Қазақстан немістерінің мәдени, тілдік және ұлттық бірегейлігін қолдау шаралары, сондай-ақ ғылым, білім және мәдениет салаларындағы бірлескен жобаларды іске асыру бойынша пікір алмасты.

Комиссияның тең төрағалары ҮАК аясындағы ынтымақтастықты кеңейтуге деген бірлескен ұмтылысты растап, Қазақстан мен Германияны байланыстыратын «жанды көпірді» күшейту үшін бірлескен іс-қимылды жалғастыруға уағдаласты.

Анықтама: статистикалық деректер бойынша, Қазақстанда 226 мың этникалық неміс, ал Германияда Қазақстаннан қоныс аударған 1 миллионға жуық неміс тұрады.

Р.Василенко атап өткендей, Қазақстанның көпұлтты халқы республикамыздың табысты дамуының маңызды факторларының бірі. «Тарихтың жазуымен Қазақстанда көптеген неміс диаспорасы, ал Германияда қоныс аударған бұрынғы отандастарымыз тұратынын айтқан дипломат мемлекеттеріміз арасындағы айтарлықтай қашықтыққа қарамастан қазақ-герман байланыстары белсенді нығайтылып, халықтарымыз бір-біріне жақындай түскенін жеткізді», – деп айтты дипломат.

Ұлты неміс қазақстандықтар еліміздің барлық салаларында қызмет етіп келеді. Астанадағы қазақ-неміс орталығы, Алматыдағы қазақ-неміс университеті, Ақтаудағы қазақ-неміс тұрақты инженерия институты, Неміс драма театры, «Deutsche Allgemeine Zeitung» газеті сияқты құрылымдардың барлығы Қазақстан мен Германия арасындағы мәдени-гуманитарлық байланысты нығайтуға маңызды үлес қосып келеді.

Осы орайда, қазақ тарапы Германия билігімен мәдениет, білім және әлеуметтік салалардағы әріптестікке ерекше мән береді. Бұл өз кезегінде Қазақстандағы этникалық немістердің жарқын келешегіне және олардың екі ел арасындағы өзара тиімді ынтымақтастыққа өз үлестерін қоса алулары үшін мүмкіндік береді.

Өз кезегінде Н.Павлик екіжақты ынтымақтастық серпінін жоғары бағалап, Қазақстан Германияның Орталық Азиядағы негізгі әріптесі екенін атап өтті. Герман тарапының тең төрағасы ГФР үкіметінің Қазақстанда тұратын этникалық немістерге көрсетіп келе жатқан қолдауы мен болашақ жоспарлары туралы хабардар етті. Оның айтуынша, Қазақстанда неміс тілін оқытуды дамыту неміс этносының ұлттық бірегейлігін сақтауға ықпал етіп қана қоймай, бірлескен инвестициялық жобалар үшін кәсіби мамандар даярлауға жақсы негіз болмақ.

Отырыс қорытындысы бойынша үкіметаралық ынтымақтастықтың дамытуды көздейтін Коммюникеге қол қойылды.

Ақпарат көзі: Министерство иностранных дел Республики Казахстан