АСТАНАЛЫҚ СТУДЕНТТЕРГЕ ЖАҢА ЖАТАҚХАНАЛАР БЕРІЛЕДІ

Жаңа оқу жылында Еуразия ұлттық университеті студенттерді жатақханамен толықтай қамтамасыз етуді жоспарлап отыр. Жаңадан салынып жатқан 4 Cтуденттік үй құрылысына жеке инвестиция тартылған және соның бірі биыл пайдалануға берілмек.

ҚР Ғылым және жоғары білім министрі Саясат Нұрбек, Астана қаласының әкімі Жеңіс Қасымбек, «Л.Н.Гумилев атындағы Еуразия ұлттық университеті» КеАҚ Басқарма төрағасы-ректор Ерлан Сыдықов бастаған жоғары оқу орнының басшылығы Жұмабаев көшесі мен Кенен Әзірбаев көшелерінің бойындағы жаңадан салынып жатқан Студенттік үйлердің құрылыс жұмысымен танысты.

Министр жаңа салынып жатқан студенттік үйдің құрылысымен танысты. Сапар аясында жаңа оқу жылына дайындықты көзбе-көз көру мақсатында құрылыс жұмыстарының сапасы тексеріліп, мердігер компаниялармен кездесу өткізілді.

«Өздеріңізге мәлім, жатақхана жайы әлі күнге күрделі. Біздің министрлік 2022 жылдан бұл мәселені бірден қолға алды. Жыл сайын он мыңнан астам төсек-орындық жатақханалар құрылысын бастап жатырмыз. Былтыр 10 343 төсек-орындық 43 нысан тапсырылса, биыл жылдың соңына дейін 27 нысан өткізілетін болады. 10 500 төсек-орыннан астам негізгі тапшылық екі қалада – Алматы мен Астана қалаларында болып отыр, бірақ келесі жылы Астанада бұл мәселені толықтай шешуге тырысамыз. Міне, 2 700 төсек-орындық жатақхана Еуразия ұлттық университетіне тапсырылып жатыр. Оның 300 және 400 орындық жатақхана құрылысын бірден бастап кеттік. Мың орындық жаңа жатақхана құрылысы келесі жылы енгізіледі. Сондықтан бұл мәселелер біздің министрліктің бақылауында болады», - деп атап өтті Саясат Нұрбек.

ЕҰУ екі жыл ішінде студенттік үйлердің санын көбейтіп, 5 мыңнан астам орынды пайдалануға беруді жоспарлап отыр. Мағжан Жұмабаев көшесінде бой көтеріп жатқан жаңа заманауи жатақханаға университет студенттері биылдың өзінде-ақ қоныстана алады.

«Қазіргі күні мемлекеттік қолдау тетігінің арқасында инвесторлар студенттік үйлердің құрылысына белсенді қызығушылық танытуда. Биыл жаңа оқу жылының алдында жаңа Студенттер үйін пайдалануға беруді жоспарлап отырмыз. Осы бағытта біз жатақханаға деген сұранысты жабатын тағы үш Студенттік үй салу бойынша белсенді жұмыс істеудеміз», - деп атап өтті

ЕҰУ ректоры Ерлан Сыдықов. ЕҰУ-дың жаңа Студенттік үйлерін инвестор-құрылыс жүргізуші «AEK Munai» ЖШС және «INTEGRA» компаниясы салуда. Қазіргі уақытта «AEK Munai» ЖШС 2 блок және 6 қабаттан тұратын ғимараттың құрылысын қарқынды жүргізуде. Студенттік жатақхананың жалпы ауданы 4,5 мың шаршы метрден асады. Құрылыс жұмысын жүргізіп жатқан «INTEGRA» компаниясы 3 блок, 5 қабаттан тұратын 2 656 орындық Студенттік үйін салуда.

Ақпарат көзі: Қазақстан Республикасы Ғылым және жоғары білім министрлігі