Халықаралық йога күнінің құрметіне елорданың орталық саябағында ашық аспан астында жаттығулар өтті. Келесі сабақ 14 маусым күні сағат 18.00-де «Астана Триатлон» саябағында («Арқар» көпірінің астындағы алаң) өтеді, деп хабарлайды Астана әкімдігінің ресми сайты.

Іс-шараға Қазақстандағы Үндістан елшілігінің өкілдері, елорда тұрғындары мен қонақтары қатысады.

Жаппай сауықтыруға негізделген йога сабақтарына елорданың әр түрлі жастағы 50-ден астам тұрғыны қатысты.

«Бұл сабақ Халықаралық йога күнін мерекелеуге ниет білдіргендерге арналды. Негізгі іс-шара 21 маусымда Бейбітшілік және келісім сарайының жанында өтеді. Көрермен алдында қазақ және үнді билерімен «Айналайын» ансамблі өнер көрсетеді. Айта кету керек, йога – бұл біздің үкімет бүкіл әлемде жүргізіп отырған мәдени дипломатияның маңызды бөлігі, сонымен қатар физикалық және психикалық денсаулыққа пайдалы», - деді Үндістанның Қазақстандағы Елшілігінің бірінші хатшысы, «Свами Вивекананда» мәдени орталығының директоры Санджай Веди.

Йога шеберлері қызықты және күрделі жаттығулар көрсетті.

«Мен Қазақстанда 18 жылдан бері йогадан сабақ беремін. Ең алдымен, йога адамдарға физикалық, эмоционалды және моральдық тепе-теңдікті сақтауға көмектеседі. Біз жұмыс істеп, күйзеліске жиі ұшыраймыз. Сабақ кезінде ақыл-ойыңызды тазартып, шаршаңқылықтан, ашудан арыласыз. Нәтижесінде қан айналымы жақсарады және энергия пайда болады», - дейді йога нұсқаушысы Сундарапандиан Раманатан.

Іс-шараға ерекше форматта қатысқысы келетіндердің арасында зейнеткерлер мен оқушылар болды.

«Бұл іс-шараға мені досым шақырды. Өзім йогамен айналыспаймын, әуесқоймын. Бірақ келгеннен кейін шыдай алмай, бірге жаттығу жасап кеттім», - деді елорда тұрғыны Лейсан Салахова.

Ақпарат көзі: ГУ «Аппарат акима города Астана»