Астанада өткен кезекті акция барысында полицейлер мен еріктілер есірткі жарнамасын бояды, деп хабарлайды елорда әкімдігінің ресми сайты.

Акцияға Сарыарқа ауданы әкімдігінің, Жастар саясаты мәселелері басқармасының, жергілікті полиция қызметі басқармасының, Қаланың есірткі қылмысына қарсы іс-қимыл басқармасының өкілдері, үкіметтік емес ұйымдар мен «Астана жастары» ЖРО еріктілері және елордалық мәслихат депутаты Дэвид Лория қатысты. Ұйымдастырушылардың айтуынша, іс-шараның негізгі мақсаты – есірткі қылмысының алдын алу, сондай-ақ тыйым салынған заттарға тәуелді елорда тұрғындарының санын азайту.

«Бұл жұмыс бізде тұрақты негізде жүргізілуде. Ауа райы жақсарғаннан кейін біз қаланың алаңдарына шығып, есірткі заттарының жарнамасын бояу жұмыстарын бастадық. Біз экологиялық акцияны ауа райы нашарлағанға дейін, осы жылдың қазан-қараша айларына дейін жалғастыруды жоспарлап отырмыз», - деді Астана қаласы Жастар саясаты мәселелері басқармасының басшысы Самат Ибраев.

Акция 2024-2025 жылдарға арналған «Астана – есірткісіз қала» нашақорлыққа қарсы іс-қимыл және алдын алу жөніндегі іс-шаралардың кешенді жоспарын, сондай-ақ Дүниежүзілік нашақорлыққа қарсы күрес күніне арналған айлықты орындау шеңберінде ұйымдастырылды.

«Акция есірткі сайттары мен есірткінің заңсыз айналымын насихаттайтын жазулар мен суреттерді жою мақсатында өткізіледі. Өскелең ұрпақ бұл әрекет қылмыстық жауапкершілікке тартылмайды деп ойлап, есірткі сататын интернет-дүкендердің граффитиін, суреттерін, жапсырмаларын таратуға тартылуда. Алайда бұл әрекеттер қылмыстық құқық бұзушылық болып саналады», – деп ескертті Астана ПД есірткі қылмысына қарсы іс-қимыл басқармасының бөлім бастығы, полиция полковнигі Сергей Ильиных.

Ақпарат көзі: ГУ «Аппарат акима города Астана»