12 ақпан күні Маңғыстау облысының әкімі Нұрдәулет Қилыбай Астана қаласында швейцариялық «Swiss Choice Holding» компаниясының өкілдерімен кездесті. Олар Түпқараған ауданында бекіре балығын өсіріп, уылдырық өндіруге бағытталған «Red Pearl» балық фермасы инвестициялық жобасының жүзеге асырылу барысын талқылады.

Каспий теңізі жағалауында жылына 100 тоннадан 600 тоннаға дейін бекіре тұқымдас балық өсіріп, 100 тонна уылдырық өндіруді көздейтін жобаға әкімдік тарапынан грант арқылы 56 гектар жер бөлінді. Жалпы құны 5,7 млрд теңгені құрайтын инвестициялық жобаның құрылысы 2025 жылдың бірінші тоқсанында басталып, 2026 жылдары пайдалануға беріледі деп жоспарлануда. Бірінші кезеңде 100 тонна бекіре өсіру көзделген.

Құрылыс жұмыстары басталған соң, 30-ға жуық жаңа жұмыс орны ашылады. Кәсіпорын өз өнімдерін ішкі нарыққа шығарып, шетелге экспорттауды жоспарлап отыр.

Нұрдәулет Қилыбай кездесуде бұл жобаның өңірдің әлеуметтік-экономикалық дамуына қосатын үлесін атап өтіп, әкімдік тарапынан толық қолдау көрсетілетінін жеткізді.

- Мемлекет басшысы Қасым-Жомарт Тоқаев Үкіметтің кеңейтілген отырысында экономиканы әртараптандыруды және инвестиция тартуды күшейтуді тапсырды. Біз осы бағытта өңірде түрлі жобаларды жүзеге асыруға ниеттіміз. Бүгін талқылаған бекіре өсіру және уылдырық өндіру саласындағы бұл инвестициялық жоба өңіріміз үшін үлкен маңызға ие. Біз жобаның табысты іске асырылуына заң аясында жан-жақты қолдау көрсетуге дайынбыз, – деді Нұрдәулет Қилыбай.

Маңғыстау облысы әкімінің баспасөз қызметі

Ақпарат көзі: ГУ "Аппарат акима Мангистауской области"