Адам құқықтары жөніндегі уәкіл Артур Ластаев «Цифрландыру, жасанды интеллект және адам құқықтары» тақырыбындағы құқықтық диалогқа қатысты. Шараны Абай атындағы Қазақ ұлттық педагогикалық университеті Қазақстан Республикасы Президенті жанындағы Адам құқықтары жөніндегі комиссиямен бірлесіп ұйымдастырды, бұл басқосу Лотарингия университеті филиалының ашылуына арналды. Құқықтық диалог Қазақстан мен Франция өкілдерінің тәжірибе алмасу, цифрлық трансформацияның құқықтық аспектілерін талқылау және құқық пен технология саласындағы бірлескен бастамаларды дамыту алаңына айналды. Іс-шарада цифрландырудың құқықтық жүйелерге әсері, жасанды интеллекттің этикалық және реттеуші аспектілері, қарқынды дамып жатқан цифрлық ортада адам құқықтарын қорғау сияқты негізгі тақырыптар қарастырылды. Жиында сөз сөйлеген Артур Ластаев цифрландырудың екі жақты сипатына тоқталды: бір жағынан ол кең мүмкіндіктер ашады, процестерді жеңілдетеді, уақытты үнемдейді және ыңғайлылықты арттырады. Екінші жағынан, жаңа қиындықтарды тудырады - кибералаяқтықтың өсуі, жеке деректердің бұзылуы, хат алмасудың құпиялылығы, сондай-ақ бақылау технологияларын пайдалану және интернеттегі зорлық-зомбылық. Омбудсменнің айтуынша, IT-технологияларды өмір саласына енгізу адамның барлық негізгі құқықтарына дерлік қауіп төндіреді. Бұл, ең алдымен, жеке өмірге қол сұғылмаушылық пен сөз бостандығына қатысты. Цифрландырудың білім алуға, денсаулыққа, алаяқтық пен жала жабу сияқты виртуалды ортада дәстүрлі қылмыстарды жасау үшін технологияларды пайдалану құқығына әсері ерекше назар аударуды қажет етеді. «Басты міндет – ақпараттық технологияларды пайдалануды кеңейту мен адамның негізгі құқықтарын қорғау арасындағы оңтайлы теңгерімге қол жеткізу. Цифрлық шындық құқықтар мен бостандықтарды жүзеге асырудың баламалы, дәстүрлі тәсілдерін ұсынатын конституциялық принциптерге сәйкес келуі керек. Цифрландыру осыларды жүзеге асырудың жалғыз құралына айналмауы керек», - деп атап өтті Артур Ластаев. Диалогқа қатысушылар интернеттегі қылмыстармен күрес және алаяқтық пен зорлық-зомбылықтан қорғау жолдарын әзірлеудегі халықаралық ынтымақтастықтың маңыздылығын атап өтті.

Ақпарат көзі: Қазақстан Республикасындағы Адам құқықтары жөніндегі уәкіл