2024 жылғы 4 қыркүйекте Астанаға Академия президенті Мұхиттин Өздемир бастаған Түркия Әділет академиясының делегациясы келді.

Сапар аясында қонақтар Бас прокуратураға барып қазақстандық прокуратураның қадағалау қызметінің негізгі бағыттарымен, сондай-ақ құқық қорғау органдарына қызметке кандидаттарды іріктеудің жаңа моделімен танысты.

Өз сөзінде Бас Прокурордың орынбасары Әсет Шыңдалиев кадрлық әлеуетті күшейту және заңдылық пен құқықтық тәртіпті қамтамасыз ету жөніндегі жұмыстың тиімділігін арттыру контексінде Қазақстан мен Түркияның уәкілетті органдары арасындағы әріптестік қатынастарды одан әрі дамытудың өзектілігін атап өтті.

Сондай-ақ делегация Бас прокуратура жанындағы Құқық қорғау органдары академиясына барып, оның ұжымымен кездесті.

Кездесу барысында Академия ректоры Марат Сексембаев түрік әріптестеріне Академияның ғылыми-білім беру қызметінің негізгі бағыттары және оның даму перспективалары туралы айтып берді. Сондай-ақ екі жоғары оқу орны арасындағы ғылыми-білім беру саласындағы Өзара түсіністік туралы меморандумды өзектендіру мен өзара іс-қимылдың маңыздылығын атап өтті.

Өз кезегінде Түркия Әділет академиясының президенті Мұхиттин Өздемир кадрларды даярлау және басқару бойынша тәжірибесімен бөлісті және кадр саясаты саласындағы басты бағыттарға тоқталып, тәжірибе алмасу және озық тәжірибе арқылы прокурорлардың біліктілігін арттыруға мүдделі екенін атап өтті.

Соңында тараптар өзара қызығушылық тудыратын мәселелер бойынша ынтымақтастықты одан әрі кеңейтуге дайын екендіктерін растады.

Бас прокуратураның баспасөз қызметі

Ақпарат көзі: Қазақстан Республикасының Бас прокуратурасы