Түркістан облыстық жоғары спорт шеберлігі мектебі 2024 жылдың қорытындысы бойынша кеңейтілген педагогикалық кеңес өткізді. Жиынға Түркістан облыстық дене шынықтыру және спорт басқармасы басшысының орынбасары Айдос Қалтаев пен мекеме басшысы Шынболат Райханов және спортшылар, жаттықтырушылар, әкімшілік қызметкерлері қатысып, жыл бойында атқарылған жұмыстарымен жеткен жетістіктерін саралап, алдағы жоспарлары туралы талқылады. Басқосу барысында басқарма басшысының орынбасары Айдос Әділханұлы ұжымның жыл қорытындысындағы жетістігіне оң бағасын берді. Аталған спорт мектебінде спорттың 13 түрінен 226 спортшыны 28 жаттықтырушы спортпен жан-жақты кәсіби тұрғыда дайындайды. Қазақстан Республикасының ұлттық құрамасында 91 шәкірті ел намысын қорғаса, оның ішінде негізгі құрамда 38 спортшы, жастар құрамасында 53 өрен еліміздің атын әлемдік ареналарда танытып жүр. Биыл Түркістан облыстық жоғары спорт шеберлігі мектебінің шәкірттері әлем чемпионаттарында 2 күміс медаль иеленсе, Азия чемпионатында 1 алтын, 3 күміс, 8 қолаға қол жеткізген. Ал Қазақстан чемпионаттарында 41 алтын, 27 күміс және 43 қола медальды облыс қоржынына салды. Сондай-ақ Азия кубогында 2 алтын, 1 күміс, 4 қола жүлде олжаласа, ҚР кубогында 10 алтын, 8 күміс, 24 қоланы еншіледі. Жалпы айтқанда жыл басынан бері 277 медаль қанжығалады. Оның ішінде 83 алтын, 65 күміс және 129 қола медаль бар. 2023 жылмен салыстырғанда биыл спортшылары медаль санын 87-ге арттырды. Жылды жемісті аяқтап, нәтижесі артқан ұжым үздік спортшылары мен жаттықтырушыларына құрмет көрсетіп, ынталандыру сыйлықтарын табыстады. Айта кетейік, Түркістан облыстық жоғары спорт шеберлігі мектебінде олипиадалық спорт түрлерінен бокс, әйелдер боксы, грек-рим күресі, дзюдо, таеквондо, (WT) садақ ату, еркін күрес, әйелдер күресі, академиялық есу, байдарка және каноэде есу, желкенді қайық спорты, жүзу, ауыр атлетика спорт түрлері дамытылады. Түркістан облысы әкімінің баспасөз қызметі

Ақпарат көзі: ГУ "Аппарат акима Туркестанской области"