ЖҰБАНОВ УНИВЕРСИТЕТІ СТУДЕНТТІК ЖАТАҚХАНАЛАРЫНДА ЖАҢА ОҚУ ЖЫЛЫНА ДАЙЫНДЫҚ ЖҰМЫСТАРЫ ЖҮРГІЗІЛДІ

Жаңа оқу жылы қарсаңында Қ.Жұбанов атындағы Ақтөбе өңірлік университетінің барлық жатақханаларына жасалған жөндеу жұмыстары аяқталды.Универ ситеттің шаруашылық қамтамасыз ету кеңсесі қызметкерлері жатақханаларға косметикалық жөндеуден бөлек интерьерді жаңарту, жылу жүйесі мен басқа да инженерлік коммуникацияларды жолға қою жұмыстарын жасады. Студенттердің қауіпсіздігі мен жайлылығы үшін дезинфекциялық жұмыстар да жүргізілді.

Қазіргі таңда Қ.Жұбанов атындағы Ақтөбе өңірлік университетінде 4 жатақхана бар. Студенттік жатақханаларда білім алушыларға барлық жағдай жасалған. Атап айтсақ, компьютерлік кабинеттер, оқу және акт залдары мен кинотеатр, ас үй, кір жуу орындары, ыңғайлы коворкинг және аула аумағындағы воркаут аймағы бар.

2024-2025 оқу жылына студенттік жатақханаларда барлығы 2200 орын дайындалып отыр. Жұбанов университеті студенттердің сапалы білім алуы үшін тең мүмкіндіктер жасауға басымдық беретіндіктен, әлеуметтік жағдайларға ерекше назар аударылады. Жатақханаларда орын алуға бірінші үміткерлер әлеуметтік осал санаттағы студенттер болып табылады.

Сондай-ақ, жатақханаларда тұру бағасы бес жыл бойы өзгеріссіз қалады. №1, 2, 3 Студенттер үйінде құны 50 500 теңге, ал Жастар үйінде жылына 75 750 теңге.

PhD докторларын тарту мақсатында Жұбанов университетінде қабылданған талант-менеджмент саясатына сәйкес болашақ жас оқытушылар үшін 12 бөлме дайындалды.

Студенттер үшін жатақханаға тіркелу білім беру гранттары бөлінгеннен кейін басталады. Орналасу "Smart Arsu" мобильді қосымшасы арқылы онлайн режимінде жүзеге асырылады. Бұл жүйенің толық автоматтандырылуы мен ашықтығын қамтамасыз етеді.

Естеріңізге сала кетейік, студенттерді жатын орындармен барынша қамтамасыз ету мақсатында университет "Эрудит" және "Salemspace" жеке жатақханаларымен меморандумдар жасады. 2024-2025 оқу жылына жеке жатақханалар университетіміздің 450 студентін қабылдайды. Жеке жатақханалардың құны айына 25 000 теңгені құрайды.

Жатақханаға орналасу бойынша барлық қажетті ақпаратты алу үшін Студенттерге қызмет көрсету орталығына көрсетілген нөмір арқылы хабарласуыңызға болады: +7 707 567 5939.

Ақпарат көзі: Қазақстан Республикасы Ғылым және жоғары білім министрлігі