Барлығыңызға үлкен үміт пен жауапкершілік жүктелуде деді бүгін Статистика күні кәсіби мерекесіне орай өткен салтанатты жиында ҚР Стратегиялық жоспарлау және реформалар Агенттігінің Төрағасы Жандос Шаймарданов.

Әріптестерді кәсіби мерекемен құттықтай отырып, Агенттік басшысы Ұлттық статистика бюросы қызметкерлерінің күнделікті, қажырлы еңбектерінің нәтижелері, оңтайлы басқарушылық шешімдерді қабылдауға және жалпыұлттық мақсаттарға қол жеткізу үшін тиімді стратегияларды әзірлеуге негіз болатынын айтты. Сонымен бірге, Агенттік пен Бюроның бастамаларын Мемлекет басшысының қолдап отырғанын атап өтті.

Спикердің айтуынша, басқа мемлекеттік органдармен бірлесіп табысты іске асырылып жатқан Бюро жұмысының тағы бір маңызды бағыты деректерді басқарудың бірыңғай саясатын құру болып табылады.

«Біз үшін деректердің бейтараптығы мен объективтілігін қамтамасыз ету өте маңызды. Соңғы 2 жылда барлық әкімшілік көрсеткіштерге, нысандарға, әдістемелерге тексеру жүргізілді. Бұл мемлекеттік деректерді басқаруға Data-Driven тәсілін енгізу жолындағы үлкен қадам» - деді Жандос Шаймарданов.

Салтанатты жиында статистика саласына еңбек сіңірген бірқатар қызметкерлер «Құрмет» орденімен, «Ерен еңбегі үшін» медалімен, «Статистика үздігі» төсбелгісімен және алғыс хаттармен марапатталды.

Ақпарат көзі: Қазақстан Республикасының Стратегиялық жоспарлау және реформалар агенттігі