Бүгін, 3 қазанда Маңғыстау ауданы Жармыш ауылына ауыз су құбыры тартылып, халық игілігіне берілді. Көптен күткен қуанышты сәтке куә болған облыс әкімі Нұрдәулет Қилыбай тұрғындарды айтулы оқиғамен құттықтады.

Ауылға су жүргізу құрылысы 2006 жылы басталған болатын. Санаулы үйге су бергеннен кейін түрлі себептермен бұл жұмыстар тұралап қалған. Бірнеше рет жобаға өзгертулер мен түзетулер енгізіліп, мердігер мекемелердің ауысу себебіне байланысты аталған жұмыстар бірнеше жылға созылды.

Араға 11 жыл салып, су құбырын салу жұмыстары қайтадан жанданды. Нәтижесінде 340 отбасы тұратын Жармыш ауылына ауыз су жеткізілді.

Тіршілік нәріне қол жеткізген ауыл тұрғындары дән риза.

- Үйімізге су келіп, қуанып отырмыз. Көп жылдан бері суды құдықтан тасып келген едік. Енді құбырмен үйге тікелей су келіп тұр. Жобаға атсалысып, көмектескен барша жанға алғыс айтамыз, - деді ауыл тұрғыны Балсұлу Жаңаева.

Ақпарат көзі: ГУ "Аппарат акима Мангистауской области"