Бүгін Мемлекеттік қызмет істері агенттігінде Республика күні – Ұлттық мерекесіне арналған салтанатты іс-шара өтті.

Іс-шараға Агенттіктің, Президент жанындағы Мемлекеттік басқару академиясының басшылығы мен қызметкерлері, мемлекеттік қызмет ардагерлері қатысты.

Салтанатты жиында, «25 қазан – тәуелсіздіктің іргеcі қаланған ерекше күн. Республика күні –  Ұлттық мереке ретінде оның қайта жаңғыруы өткенімізді әділ бағалап, болашаққа жаңаша қадам жасаудың көрінісі. Мемлекет басшысы Республика күніне арналған салтанатты жиында «Өзара тілеулестік пен қамқорлықтың арқасында сынақтан сүрінбей өттік. Шын мәнінде, біздің барлық жетістігіміз берекелі бірлік пен ырысты ынтымақтан бастау алады. Бұл – ұйысқан ұлт, мықты мемлекет болудың басты кепілі» деп атап көрсетті. Тарихтан тағылым алу, Егемендіктің қадіріне жете білу бүгінгі ұрпақтың басты парызы. Тәуелсіздікті баянды ету жолында бар күш-жігерімізді салып, адал еңбек ету баршамыздың ортақ міндетіміз», -  деді Агенттік төрағасы Дархан Жазықбай.

Агенттіктің және Президент жанындағы Мемлекеттік басқару академиясының қызметкерлері Мемлекет басшысының Жарлығына сәйкес мемлекеттік наградаларымен марапатталды.

Сонымен қатар, салтанатты іс-шарада бірқатар мемлекеттік қызмет саласының ардагерлеріне «Мемлекеттік қызмет ардагері» төcбелгілері табысталды.

Мемлекеттік қызметке алғаш рет қабылданған мемлекеттік қызметшілер Қазақстан халқына адал қызмет етуге салтанатты түрде ант берді.

Ақпарат көзі: Агентство Республики Казахстан по делам государственной службы