Қазақстан Республикасындағы Адам құқықтары жөніндегі уәкіл кеңсесінде Оңтүстік Калифорния университеті студенттерінің Қазақстанға сапары аясында оқу орнының Саяси және халықаралық қатынастар факультеті Адам құқықтары кафедрасының доценті Стив Свердлоу бастаған топпен кездесу өтті.

Іс-шараның мақсаты – Қазақстан мен АҚШ арасындағы білім саласындағы серіктестік пен ынтымақтастықты одан әрі дамыту.

Кездесу барысында кеңсе өкілі Майя Қасымова студенттерді Омбудсменнің қызметімен, атап айтқанда, Адам құқықтары жөніндегі уәкілдің бастамаларымен қолға алынған азаптаулардың алдын алу және оған қарсы күрес шараларымен, ұлттық құқық қорғау институтының әлеуетін нығайту бойынша жүргізіліп жатқан жұмыстармен, конституциялық реформамен, саладағы соңғы жаңалықтармен жан-жақты таныстырды.

Сондай-ақ өкіл Ұлттық алдын алу тетігі, оның қызметі мен нәтижелері туралы айтып, ҰАТ қатысушылары өткен жылы 461 профилактикалық сапар өткізіп, 3 мыңнан астам ұсыныс жасағанын атап өтті. Майя Қасымова қазіргі кезде Ұлттық алдын алу тетігі туралы арнайы заң әзірлеу мәселесі талқыланып жатқанын да жеткізді.

Сонымен қатар адам құқықтарының өзекті мәселелері, азаптаумен күрес, кемсітушілікке жол бермеу, азаматтық сектормен өзара іс-қимыл және т.б. тақырыптар талқыланды.

Өз кезегінде студенттер Қазақстандағы Омбудсмен институтының тарихы мен қызметіне қызығушылық танытып, сұрақтар қойып, пікірлерімен бөлісті. Нәтижесінде келушілер кездесуді ұйымдастырғаны үшін Уәкіл кеңсесіне алғыстарын білдірді.

Айта кетейік, Стив Свердлоу 2010-2019 жылдар аралығында Орталық Азия елдеріндегі халықаралық ұйымдарда жұмыс істеген. Бүгінде ол Оңтүстік Калифорния университетінде Еуразиядағы адам құқықтары бойынша бакалавриат пен магистранттарға сабақ береді.

Ақпарат көзі: Қазақстан Республикасындағы Адам құқықтары жөніндегі уәкіл