Адам құқықтары жөніндегі уәкіл Артур Ластаев банк омбудсмені Дархан Нұрпейісовпен кездесу өткізді, кездесу барысында азаматтардың құқықтарын қорғаудың өзекті мәселелері талқыланды.

Банк омбудсменінің құзыретіне басқалармен қатар, ипотекалық қарыз алушылар мен банктер арасындағы келіспеушіліктерді шешу кіреді.

Айта кетерлігі, банктер ипотека беру арқылы адамның лайықты баспанаға құқығын қамтамасыз етуге тікелей қатысады. Бұл құқық Экономикалық, әлеуметтік және мәдени құқықтар туралы халықаралық пактіде көрсетілген. Онда әркім өзі және отбасы үшін тиісті өмір сүру деңгейіне, оның ішінде тұрғын үйге және өмір сүру жағдайларын үздіксіз жақсартуға құқығы бар екені айтылған.

Азаматтардың лайықты тұрғын үйге құқықтарын жүзеге асыру мәселесінде Адам құқықтары жөніндегі уәкіл мен Банк омбудсменінің өкілеттіктері өзара тығыз байланысты.

Құқық қорғаудың тиімділігін арттыру үшін Артур Ластаев барлық уәкілдердің күш-жігерін біріктіруді ұсынды.

«Біздің жұмысымыз тиімді әрі үйлестірілген болуы үшін барлық омбудсмендердің күш-жігерін біріктіру маңызды рөл атқарады. Бұл әртүрлі салаларда, соның ішінде банк және қаржы секторында азаматтардың құқықтарын қорғаудың жоғары деңгейін қамтамасыз етеді. Біз омбудсмендердің жұмысы барынша ашық және тәуелсіз болуын қамтамасыз етуге ұмтылуымыз керек», - деп атап өтті ол.

Бүгінгі таңда Банк омбудсменінің банктік қызмет көрсетуге қатысты барлық мәселелерді қарастыруға мүмкіндіктері мол.

Адам құқықтары жөніндегі уәкіл мен кеңсесі Банк омбудсменінің жұмысына қажетті барлық қолдауды көрсететініне сендірді.

Өз кезегінде Дархан Нұрпейісов институт құрылғалы бері негізгі құзыреті ипотекалық дауларды шешуге бағытталғанын, бірақ келіп түскен өтініштердің 70 пайызы басқа проблемаларға байланысты екенін, бұл институт өкілеттіктерін кеңейту қажеттілігін тудырғанын айтты.

Қорытындылай келе, тараптар одан әрі ынтымақтастық туралы келісті.

Ақпарат көзі: Қазақстан Республикасындағы Адам құқықтары жөніндегі уәкіл