ҚАРТУ МЕН АТАТҮРІК УНИВЕРСИТЕТІ АРАСЫНДА ӨЗАРА ТҮСІНІСТІК ТУРАЛЫ МЕМОРАНДУМҒА ҚОЛ ҚОЙЫЛДЫ

  Әбілқас Сағынов атындағы Қарағанды техникалық университетіне Ататүрік университетінің делегациясы, атап айтқанда, ректор, профессор, доктор Омер Чомакли, халықаралық мәселелер жөніндегі үйлестіруші, профессор, доктор Ташкин Өзташ, Халықаралық қатынастар басқармасындағы Erasmus+ бағдарламасына жауапты Пинар Учак келді.

  Сапардың мақсаты Ататүрік университеті мен Ә.Сағынов атындағы ҚарТУ арасында өзара түсіністік туралы Меморандумға қол қою болды.

  Ә.Сағынов атындағы ҚарТУ-дың Басқарма төрағасы-Ректоры С.Сагинтаева ЖОО өткен жылы өзінің 70 жылдық мерейтойын атап өтіп, елдің жетекші техникалық жоғары оқу орны ретінде танылғанына тоқталды. QS World University Rankings: Asia 2024 рейтингінде өткен жылмен салыстырғанда Қарағанды техникалық университеті 20 позицияға көтеріліп, ТОП-251+ қатарына енді. Ал Ұлттық рейтинг қорытындысы бойынша Қазақстанның үздік техникалық жоғары оқу орындары арасында 5-ші орында.

  Эрзурум қаласында орналасқан Ататүрік университеті – Түркияның 45 мыңнан астам студенті бар аса ірі оқу орындарының бірі. Ол 1957 жылы құрылды. Соңғы жылдары Түркияның 20 жетекші университеттерінің бірі, халықаралық рейтингтегі үздік жоғары оқу орындарының 5 пайызына кіреді.

Ақпарат көзі: Қазақстан Республикасы Ғылым және жоғары білім министрлігі