Қорғаныс министрлігі «Atamnyn Amanaty» ҚБ-мен бірлесіп ұйымдастырған шағын футболдан біріншілік өткізу идеясына «Қарулы күштердің ардагерлері», «Застава тарландары», «Ауғанстан және жергілікті соғыстар ардагерлері одағы» қоғамдық бірлестіктері қолдау көрсетті.

Футбол жарысы Кеңес Одағының Батыры, Халық қаһарманы Сағадат Нұрмағамбетов пен Халық қаһарманы Рақымжан Қошқарбаевтың туғанына 100 жыл толуына, сондай-ақ кіші сержант Раджан Батырқановтың ерлігіне 30 жыл толуына орай ұйымдастырылып отыр.

 «Жетісу» мәдениет және демалыс саябағындағы футбол алаңында өткен біріншілікке барлығы 13 команда қатысты. 

Кіші сержант Раджан Батырқанов 1994 жылы 28 қыркүйекте тәжік-ауған шекарасында содырлармен болған шайқаста ерлікпен қаза тапқанда турнирге қатысушы студенттердің жасында болатын. Сол шайқасқа қатысушылардың айтуынша, Шығыс Қазақстан облысының Катонқарағай ауданынан шақырылған он тоғыз жасар қаһарман көптеген әріптестерінің өмірін сақтап қалған.

Жарыс қорытындысы бойынша Астана Халықаралық университеті Педагогикалық колледжінің командасы чемпион атанды. Екінші орынды Мағжан Жұмабаев атындағы Халықаралық колледж, үшінші орынды Лев Гумилев атындағы Еуразия ұлттық университетінің колледжі, төртінші орынды Менеджмент, бизнес және білім колледжі иеленді.

Астана Халықаралық университеті Педагогикалық колледжінің студенттері жарыс номинанттары атанды.  Арслан Арыстанбеков «Үздік қақпашы», Ернұр Серікқазы «Үздік шабуылшы» атанса, «Үздік қорғаушы» атағына Мағжан Жұмабаев атындағы Халықаралық колледждің студенті Әлихан Сапабек ие болды.

Ақпарат көзі: Министерство обороны Республики Казахстан