Астанада «Барыс Арена» мұз сарайында балаларға арналған қайырымдылық хоккей матчы өтті, деп хабарлайды елорда әкімдігінің ресми сайты.

Іс-шара Астана қаласы Есіл аудандық әкімдігі мен қалалық прокуратураның бастамасымен ұйымдастырылып отыр.

«Бұл жарыс «Бақытты және қауіпсіз балалық шақ» жобасы аясында өтіп жатыр. Бүгінгі ойынды тамашалауға келген жұртшылық, ата-аналар әдемі ойынға куә болады деп сенемін.Спортшыларды жақсы ойын көрсетуге шақырамын», - деді Есіл ауданының прокуроры Ерденбек Тоқбаев.

Ұйымдастырушылардың айтуынша бұл іс-шара балалар арасында бұқаралық спортты дамытуға және олардың спорттық ұмтылыстарын қолдауға бағытталған.

Балалар үшін бұл жай ойын емес, командамен бірге дамуға, үйренуге және өсуге мүмкіндік.

«Отбасы құндылығын дәріптеп, бұқаралық спорттың дамуына үлес қосуға бағытталған осындай шараны өткізуге бастама көтергені үшін аудандық прокуратураға алғысымды айтамын. Бүгінгі ойында ең үздік спортшының жеңіске жетуіне тілектеспін», - деді Астана қаласының Жастар саясаты мәселелері басқармасының басшысы Самат Ибраев.

Ақпарат көзі: ГУ «Аппарат акима города Астана»