Астанада «Әлеуметтік инклюзивтілікке қол жеткізу мақсатында Мүгедектердің құқықтары туралы БҰҰ конвенциясын жүзеге асыру» атты халықаралық семинар басталды. Іс-шараға түрлі елдердің халықаралық ұйымдары мен мемлекеттік органдарының өкілдері қатысады. Үш күн ішінде қатысушылар мүгедектігі бар адамдарды қорғау жүйелерін енгізудің сәтті мысалдарымен бөліседі, инклюзия саласында әртүрлі елдердің алдында тұрған сын-қатерлерді талқылайды, сондай-ақ оларды шешу үшін ұсынымдар әзірлейді.

Біріккен Ұлттар Ұйымы мен ҚР Еңбек және халықты әлеуметтік қорғау министрлігі ұйымдастырған семинар мүгедектігі бар адамдардың құқықтарын іске асыру мәселелерін талқылау және инклюзивті саясатты жақсарту үшін шешімдер іздеу үшін негізгі алаңға айналады.

«Бұл семинар бізге өзекті мәселелерді анықтап қана қоймай, оларды шешу жолдарын да анықтауға мүмкіндік береді. Біз мүгедектігі бар адамдардың құқықтарын қорғау саласындағы жағдайды жақсартуға көмектесетін жетекші сарапшылар мен белсенділердің пікірлерін жинадық», – деді ҚР Еңбек және халықты әлеуметтік қорғау министрінің кеңесшісі, іс-шараның үйлестірушісі Захира Бегалиева.

Халықаралық мүгедектер ұйымдары одағының төрағасы Василий Назаренко семинарға жоғары баға беріп, сондай-ақ Қазақстанда әзірленіп жатқан 2030 жылға дейінгі инклюзивті саясат тұжырымдамасының мүгедектігі бар адамдардың бүкіл қауымдастығы үшін маңыздылығын атап өтті. Бұл ретте ол біздің елімізде ерекше қажеттіліктері бар адамдардың құқықтарын белсенді ілгерілетуге оң баға берді.

«Тұжырымдаманы қабылдау – тең мүмкіндіктерге жетудің тағы бір маңызды қадамы. Ол әрбір адамға, оның физикалық мүмкіндіктеріне қарамастан, қоғамға ықпалдасу құқықтары мен мүмкіндіктерін іске асыруды қамтамасыз етеді», – деп атап өтті Василий Назаренко.

Семинардың үшінші сессиясы аясында ҚР Еңбек және халықты әлеуметтік қорғау министрі Светлана Жақыпованың Халықаралық мүгедектер ұйымдары одағының мүшелерімен жұмыс кездесуі өтті. Талқылаудың басты тақырыбы Қазақстанның БҰҰ Мүгедектердің құқықтары туралы Конвенциясының орындалуы туралы 1-ші баяндамасын қорғау қорытындылары болды.

Светлана Жақыпова алғы сөзінде мүгедектігі бар адамдар ұйымдарының халықаралық одағының өкілдеріне ұзақ мерзімді ынтымақтастығы үшін алғысын білдіріп, берік байланыстар құруға қызығушылық білдірді, сондай-ақ семинар шеңберінде барлық жоспарланған кездесулерді өткізуде табыс тіледі.

«2015 жылы Қазақстан Мүгедектердің құқықтары туралы конвенцияны ратификациялады. Қолданыстағы заңнаманы түгендеу нәтижелері бойынша 2015 жылғы 3 желтоқсанда «Қазақстан Республикасының кейбір заңнамалық актілеріне мүгедектердің құқықтарын қорғау мәселелері бойынша өзгерістер мен толықтырулар енгізу туралы» заң қабылданды. Мүгедектігі бар адамдар үшін әлеуметтік және көлік инфрақұрылымының қолжетімділігін қамтамасыз етуге қатысты 24 заңға түзетулер енгізілді. 2023 жылы Конвенцияға Факультативтік хаттама ратификацияланды, Әлеуметтік кодекс қабылданды», – деді министр.

Кездесу барысында Қазақстанның әлеуметтік-еңбек саласындағы цифрлық инновациялар да көрсетілді.

Германияның Федералды Еңбек және әлеуметтік істер департаментінің басшысы Торстен Эйнстманн Инклюзивті еңбек нарығы және мүгедектер теңдігі туралы заң жайында айтты.

Армения Республикасының Бірыңғай әлеуметтік қызмет бөлімінің басшысы Римма Еганян Армениядағы мүгедектікті бағалаудың жаңа жүйесінің тиімділігі туралы хабардар етті және Мүгедектердің құқықтары туралы конвенцияны іске асыру шеңберінде мүгедектігі бар адамдарға көрсетілетін қызметтерді жетілдіру процесін таныстырды.

11 қазанда семинарға қатысушылар қарау және кейіннен іске асыру үшін әртүрлі елдердің үкіметтік органдарына қорытынды ұсынымдарды ұсынады.

Ақпарат көзі: Министерство труда и социальной защиты населения Республики Казахстан