Назарбаев Университетінде сегіз спорт түрінен Студенттік спорт лигасының финалы өтті. Оған Қазақстанның түкпір-түкпірінен келген 750-ден астам студент қатысып, бақтарын сынады. Салтанатты ашылу рәсіміне ҚР ҒЖБМ Жоғары және жоғары оқу орнынан кейінгі білім комитеті төрағасының орынбасары Ақерке Абылайхан, сондай-ақ спорт федерацияларының өкілдері мен кәсіби спортшылар қатысты.

     Студенттік спорт лигасы биыл алғаш рет барлық жоғары оқу орны үшін бірыңғай турнир аясында өтті. Бірлескен жарысқа бастама жасап, шараны ұйымдастырған – Назарбаев Университеті.

     Студенттік командалар негізгі спорт түрлері – үстел теннисі, қазақ күресі, шахмат, тоғызқұмалақ, баскетбол, сондай-ақ жүзу, кикбоксинг және тхеквондо сияқты қосымша спорт түрлері бойынша жарысқа түсті.

     Бірінші болып жүзу және кикбоксинг бойынша финал өтті. Жүзуден жарысқа 14 ЖОО-дан 61 студент қатысты. Спортшылар 50 және 100 метр қашықтыққа еркін, баттерфляй, брасс, арқамен жүзу, сондай-ақ командалық эстафета бойынша өнер көрсетті. Ең көп медальды NU олжалады, екінші және үшінші орындарды М.Қозыбаев атындағы СҚУ мен әл-Фараби атындағы ҚазҰУ бөлісті.

     Кикбоксинг турниріне 25 командадан 135 студент қатысты. Жарыс WAKO Full Contact түрі бойынша жастар санаттарында өтті. Медальдардың жалпы саны бойынша І орынды Ш.Мұртаза атындағы Халықаралық Тараз инновациялық институты иеленді. Астана Халықаралық университетінің Педагогикалық колледжі ІІ орын, ҚР ІІМ Б.Бейсенов атындағы Қарағанды академиясы ІІІ орын алды.

     Қазақ күресі бойынша 26 ЖОО-ның студенттері 10 салмақ дәрежесі бойынша бақ сынады. Медальдардың жалпы саны бойынша І орынды Ясауи атындағы ХҚТУ, ІІ орынды Қазақ спорт және туризм академиясы, ІІІ орынды Х.Досмұхамедов атындағы Атырау университеті иеленді.

     Теннис финалына 93 спортшы, 15 ерлер және 16 әйелдер командасы қатысты. Ерлер арасындағы командалық есепте І орынды Академик Ә.Қуатбеков атындағы Халықтар достығы университеті, ІІ орынды М.Өтемісов атындағы Батыс Қазақстан мемлекеттік университеті, ІІІ орынды SDU алды. Әйелдер арасындағы командалық есепте Шымкент университеті үздік атанып, ІІ орынды Qyzpu, ІІІ орынды Семей қаласының Шәкәрім атындағы университеті олжалады.

     Одан кейін шахмат және тоғызқұмалақ бойынша финал өтті. Тоғызқұмалақ бойынша 7 раундта 14 ЖОО командалары бақ сынады. Жігіттер арасында І орынды Абай атындағы ҚазҰПУ, ІІ орынды Л.Гумилев атындағы ЕҰУ, ІІІ орынды Жұбанов университеті алды. Әйелдер арасындағы командалық жарыста әл-Фараби атындағы ҚазҰУ үздік атанып, ІІ орынды Абай атындағы ҚазҰПУ, ІІІ орынды Ә. Марғұлан атындағы ППУ иеленді.

     Шахмат бойынша 15 университет студенттері бақ сынады, әр команда 9 ойынға қатысты. Ерлер арасындағы командалық есепте NU топ жарып, ІІорынды әл-Фараби атындағы ҚазҰУ, ІІІ орынды Л.Гумилев атындағы ЕҰУ олжалады. Әйелдер арасындағы командалық есепте әл-Фараби атындағы ҚазҰУ командасы жеңіске жетті, ІІ орынды NU, ІІІ орынды MNU алды. Шахмат турнирінің жеңімпаздары медальдармен қоса, Қазақстан шахмат федерациясынан ақшалай сыйлықтар алды.

     Баскетболдың финалында 180 студент бақ сынады. Халықаралық білім беру корпорациясы ерлер арасында жеңімпаз атанды, ІІ орынды NU, ІІІ орынды ХАТУ алды. Қыздар арасында әл-Фараби атындағы ҚазҰУ үздік атанып, ІІ орынды Ясауи атындағы ХҚТУ, ІІІ орынды Қорқыт Ата атындағы ҚУ иеленді.

    Футзал мен волейбол бойынша финал 2024 жылғы күзде өтеді. Осы спорт түрлері бойынша жеңімпаздар анықталғаннан кейін Студенттік спорт лигасының жабылу салтанаты өтеді.

    Жалпы Студенттік спорт лигасы 2021 жылдан бастап спорттың 7 түрі бойынша үстел теннисі, қазақ күресі, шахмат, тоғызқұмалақ, баскетбол, волейбол, футзал бойынша өткізілуде.

Ақпарат көзі: Қазақстан Республикасы Ғылым және жоғары білім министрлігі