Үндістанның солтүстіктегі Уттаракханд штатының «Сурья» полигонында қазақстандықтар мен үндістандықтардың «ҚазҮнді»-2024» бірлескен оқу-жаттығуы жалғасуда. 

Жоспар бойынша қатысушылар тау дайындығына кірісті. Қазақстандық әскери қызметшілерге бұл элементтер жақсы таныс. Мұндай жаттығуды олар Жамбыл облысы Жуалы және Меркі аудандарының тау шатқалдарында бірнеше рет пысықтаған. Дегенмен, олар Гималай тау бөктерінде алғаш рет жаттығуда. 

«ҚазҮнді-2024» оқу-жаттығуы өткізілетін тау лагері теңіз деңгейінен 2700 метр биіктікте орналасқан. Жер бедері көптеген тапсырмаларды орындауға мүмкіндік береді: жартасқа тік көтерілу және фалмен төмен түсу, тау бөгеттері мен жартастардан өту және жаралыларды эвакуациялау.

– Біздің әскери қызметшілер мұндай жаттығулардан өтіп жүр. Алайда, бейтаныс таулы жер ортаға бейімделуді және кезең-кезеңімен зерделеуді қажет етеді. Бұдан бөлек қауіпсіздік шараларын сақтауға ерекше көңіл бөлінеді, – деді Қазақстан контингентінің офицері капитан Сәкен Мусин. 

Ер адамдармен бірге әскери қызметші қыздар да жартасқа өрмелеу тапсырмаларын орындайды. Олардың арасында «Оңтүстік» өңірлік қолбасшылығы 5-ші механикаландырылған бригадасы жауынгерлік даярлық бөлімінің сержанты Жанна Досымова да бар. 

Екі елдің әскери қызметшілері тау даярлығы мәселелерін іс жүзінде жетілдіріп жатқанда, қазақстандық контингент басшысы «Оңтүстік» ӨңҚ штаб бастығы полковник Нұрлан Кәрібаев үндістандық әріптестерімен жаттығудың кезекті кезеңінің дайындығына кірісті. Бұл терроризмге қарсы қауіпсіздік мәселелері жөніндегі практикалық сабақтар болмақ. 

Естеріңізге сала кетсек, «ҚазҮнді-2024» оқу-жаттығуы Үндістанда 30 қыркүйекте басталып, 13 қазанға дейін жалғасады. Қазақстан контингентінің құрамына «Оңтүстік» өңірлік қолбасшылығының Құрлық әскерлері және Десанттық-шабуылдау әскерлерінің әскери қызметшілері бар. Бұл жаттығуға Үндістан Қарулы Күштерінен Кумаон полкі 5-батальонының әскери қызметшілері қатысуда.

Ақпарат көзі: Министерство обороны Республики Казахстан