2024 жылғы 14 қазанда Сан-Марино Республикасының Курсаал Конгресс сарайында кіші еуропалық мемлекеттердегі конституционализм аспектілері туралы конференция басталды.

Конференцияны Еуропа Кеңесінің жаңадан тағайындалған Бас хатшысы Ален Берсе мырзаның қолдауымен Сан-Марино Республикасының Сыртқы істер министрлігі Еуропа Кеңесі жанындағы Венециандық комиссиямен (Құқық арқылы демократия үшін Еуропалық комиссия) бірлесіп ұйымдастырған.

Халықаралық конференцияға қонақтар ретінде Қазақстан Конституциялық Сотының Төрағасы Эльвира Азимова, Молдова Конституциялық Сотының Төрағасы Домника Маноле, Лихтенштейн Конституциялық Сотының Төрағасы доктор Хильмар Хох, сондай-ақ Грузия мен Румынияның конституциялық соттарының делегациялары қатысып жатыр.

Халықаралық конференция Венециандық комиссия мүшелерінің, конституциялық бақылау органдары төрағаларының, ғалымдардың, Сан-Марино заңгерлерінің және кіші еуропалық мемлекеттердің, Румыния, Грузия, Қазақстан конституциялық соттары делегацияларының, сондай-ақ GRECO, MONEYVAL және CEPEJ өкілдерінің қатысуымен форумға айналады.

Қатысушыларға Сыртқы істер, саяси мәселелер, халықаралық экономикалық ынтымақтастық және цифрлық ауысу министрі Лука Беккари мырза, Әділет, әл-ауқат және отбасы министрі Стефано Канти мырза, Құрметті президент, Венециандық комиссиясының арнайы өкілі профессор Джанни Букиккио, Ережелердің Конституцияға сәйкестігі бойынша кепілгерлер тобының вице-президенті профессор Джузеппе де Верготтини сөз сөйледі.

Талқылау және презентация тақырыбы – кіші еуропалық мемлекеттердегі конституционализм аспектілері және шағын мемлекеттердегі сот институттарының тәуелсіздігі мен бейтараптығын қамтамасыз етуге бағытталған сот реформаларын енгізу бойынша практикалық сын-қатерлер мен жетістіктер.

Ақпарат көзі: Қазақстан Республикасының Конституциялық Соты