Астанада Қазақстан Республикасының Энергетика министрі Алмасадам Сәтқалиев ОПЕК халықаралық Даму Қорының президенті Абдулхамид Альхалифамен кездесті.

Келіссөздер барысында тараптар ынтымақтастықты дамытудың негізгі бағыттары мен ОПЕК Қорының қолдауымен инвестициялық жобаларды іске асыру мүмкіндіктерін талқылады. Қор президенті ұйымның техникалық қолдауды да, гранттарды да ұсынуға дайын екенін атап өтті, сондай-ақ Орталық Азия елдерінде жүзеге асырылып жатқан ағымдағы жобалар туралы айтты.

Энергетика министрі өз кезегінде 2060 жылға қарай көміртегі бейтараптығына қол жеткізу жөніндегі ұлттық мақсаттарға сәйкес келетін Қазақстанда жаңартылатын энергия көздері объектілерін салу жөніндегі ірі жобалар туралы хабарлады. Ол сондай-ақ инвестицияларды қорғау үшін ерекше жағдайларды, сондай-ақ өндірісті оқшаулау және геологиялық барлау салаларындағы инвесторлар үшін тұрақты фискалдық және реттеуші преференцияларды ұсынудың маңыздылығын атап өтті.

Кездесу қорытындысы бойынша тараптар "жасыл" энергетика саласындағы бірлескен инвестициялық жобаларды іске асыру мүмкіндіктерін зерделеуді, сондай-ақ "таза" көмір технологияларын дамыту перспективаларын қарауды жалғастыруға келісті.

Анықтама:

ОПЕК халықаралық даму қорын 1976 жылы ОПЕК-ке мүше мемлекеттер құрды. Қор дамушы елдердің экономикалық дамуына ықпал ететін халықаралық даму қаржы институты болып табылады. Қорға мүше мемлекеттер 12 ел: Алжир, Венесуэла, Габон, Индонезия, Иран, Ирак, Кувейт, Ливия, Нигерия, Сауд Арабиясы, БАӘ және Эквадор.

Ақпарат көзі: Министерство энергетики Республики Казахстан