Конституциялық Сот Аппаратының басшысы Зере Утебаева бейнеконференцбайланыс (Zoom) арқылы Азиялық конституциялық соттар және балама институттар қауымдастығы Бас хатшыларының кеңесіне қатысты. Шара 2024 жылдың 17-18 қыркүйегінде Таиландтың Бангкок қаласында өтетін Қауымдастықтың VI Конгресіне дайындық аясында өтті.  

Күн тәртібінде Таиланд Корольдігінің Конституциялық Сотының Қауымдастыққа төрағалық ету кезеңіндегі қызметінің қорытындылары талқыланды. Қатысушылар сонымен қатар келесі төрағалық миссиясына қатысты мәселелерді қарастырып, алдағы конгресстің қорытынды құжаты – Бангкок декларациясының жобасын талқылады.

Қауымдастық 2010 жылы құрылған және бүгінде Әзірбайжан, Ауғанстан, Бангладеш, Үндістан, Индонезия, Иордания, Қазақстан, Қырғызстан, Малайзия, Мальдив аралдары, Моңғолия, Мьянма, Пәкістан, Корея Республикасы, Ресей, Филиппин, Тәжікстан, Тайланд, Түркия және Өзбекстан сияқты 20 мүше мемлекетті қамтиды.

Ақпарат көзі: Қазақстан Республикасының Конституциялық Соты