Батыс Қазақстан облысы Казталов ауданы орталығында 320 орынға лайықталған заманауи спорт кешені пайдалануға берілді. Нысанның ашылу салтанатына облыс әкімі Нариман Төреғалиев, облыстық мәслихат депутаттары Тұрарбек Тілемісов, Самат Хасанов, КПО б.в. компаниясының бас директорының орынбасары Мұхтар Манкеев, спорт ардагерлері және аудан тұрғындары қатысты.

Облыс әкімі Нариман Төреғалиев аудан тұрғындарын жаңа спорт кешенінің ашылуымен құттықтады.

«Мемлекет басшысы Қасым-Жомарт Тоқаев ауылдық жерлерде спортты дамыту – жастардың денсаулығы мен тәрбиесіне оң әсер ететінін атап өткен болатын.  Казталов ауданында спорт саласының дамуына сеп болар, ауданның әлеуетін арттыруда маңызы зор нысанды пайдалануға беріп отырмыз. Спорт кешені халық игілігіне қызмет ете берсін!»,  — деп атап өтті облыс әкімі.

Спорт кешенінің құрылысы «Қарашығанақ Петролеум Оперейтинг Б.В.» компаниясының қаржыландыруымен салынды.  Кешенде волейбол, шағын футбол, баскетбол, бокс, дзюдо, күреске арналған залдар бар. Сондай-ақ, ауыл балаларына түрлі спорттық секциялар  жұмыс жасайды. Ауыл тұрғындарының да бос уақытта спортпен шұғылдануға мүмкіндік қарастырылған.

Сонымен қатар, Казталов ауданы Қайыңды ауылында мәдениет үйінің ғимараты пайдалануға берілді. Мәдениет үйінің жалпы ауданы 3600 шаршы метрді құрайды. Осы уақытқа дейін облыс әкімі Нариман Төреғалиевтың тұрғындармен кездесуінде қайыңдылықтар ауылға жаңа мәдениет үйінің қажет екендігі жөнінде мәселені жиі көтеріп жүрді.  Осылайша, халықтың талап-тілегі орындалып, заман талабына сай рухани орда есігін айқара ашты.

Ақпарат көзі: ГУ «Аппарат акима Западно-Казахстанской области»