ҚР Еңбек және халықты әлеуметтік қорғау министрлігінде 25 қазанда атап өтілетін ұлттық мереке – Республика күніне орай салтанатты жиын өтті.

Іс-шараға Министрліктің орталық аппаратының, ведомствоға бағынысты ұйымдар мен аумақтық департаменттерінің қызметкерлері қатысты.

ҚР Еңбек және халықты әлеуметтік қорғау министрі Светлана Жақыпова ұжымды мерекемен құттықтап, тәуелсіз Қазақстанның әлеуметтік-еңбек саласын дамытуға қосқан үлесі мен ел игілігі үшін атқарып жатқан еңбектері үшін алғыс айтты.

«Өзіңізге белгілі Мемлекет Басшысы Ұлттық құрылтайдың 1-ші отырысында Республика күнінің ұлттық мереке ретіндегі мәртебесін қалпына келтіруді ұсынды. Осы бастама аясында саяси жаңғырту және экономиканы трансформациялау басталды.

Министрлік көптеген заңдар мен бағдарламалық құжаттарды әзірлеп, әлеуметтік-еңбек саласын, сондай-ақ халықтың көші-қоны саласында ауқымды цифрландыруды жүзеге асыруда. Бұл жұмыстардың барлығы халқымыздың өмір сүру сапасын жақсартуға бағытталған.

Әріптестерімді келе жатқан Республика күнімен құттықтаймын! Айтулы мереке қарсаңында сіздердің еңбектеріңізді ерекше атап өткім келеді. Сіздердің халқымыздың әл-ауқатын арттыру мақсатындағы қажырлы еңбектеріңіз еліміздің әлеуметтік саясатын оңтайлы жүзеге асыруға мүмкіндік береді. Баршаңызға зор денсаулық пен сәттілік тілеймін!», – деді Светлана Жақыпова.

Іс-шара барысында әлеуметтік-еңбек саласының ардагерлері, Министрлік пен оған  бағынысты ұйымдардың қызметкерлері түрлі мемлекеттік және ведомстволық наградаларға ие болды. Атап айтқанда олар «Құрмет» ордені (6 адам), «Ерен еңбегі үшін» (7 адам) және «Мемлекеттік қызмет ардагері» медалі (1 адам), «Әлеуметтік еңбек саласының үздігі» төсбелгісі 3 адам, ҚР Еңбек және халықты әлеуметтік қорғау министрінің атынан құрмет грамоталары (2) және алғыс хаттары (2 адам), ҚР Кәсіподақтар федерациясының құрмет грамотасы (1 адам) және алғыс хаты (1 адам), «Қызмет» Мемлекеттік қызметшілер салалық кәсіподағының  құрмет грамотасы (1 адам) және алғыс хаты (1 адам) және «Мемлекеттік қызметкерлер кәсіподағының үздігі» (1 адам) төсбелгісімен марапатталды.

Ақпарат көзі: Министерство труда и социальной защиты населения Республики Казахстан